Родителите стануваат фрустрирани кога нивното бебе не сака да заспие во текот на денот, па еве неколку причини зошто вашето бебе се бори со дневниот сон и совети како да го вратите ритамот на спиење во нормала.
Д-р Харви Карп, основач на „Happiest Baby“ и еден од водечките педијатри во Америка, објаснува како да го вратите секојдневниот ритам на спиење на бебето.
- Откријте што му пречи на бебето
Откријте дали бебето е гладно, ако е гладно, нахранете го. Побарајте други причини зошто би можело да му биде некомотно. Дали на бебето му е премногу топло или ладно? Можеби облеката е непријатна? Дали има премногу светлина во собата?
- Бебето е премногу стимулирано
Регулирајте ја температурата во просторијата, намалете ја бучавата и користете звуци за опуштање. Ако доите, избегнувајте консумирање стимуланси, како што се чоколадо или кафе и проверете дали има разлика во спиењето на вашето бебе.
- Не е доволно стимулирано
Не шетајте на прсти низ куќата. Бебињата се смируваат со нормалните звуци во домот. Бебињата, кои сакаат движење, имаат корист од спиење во безбедно столче или носилка за бебе. Запомнете дека е гласно и во стомакот на мајката и дека бебињата и таму се постојано во движење!
- Вашето бебе е преуморно
Ако забележите дека вашето бебе лесно заспива во автомобил или е мрзоволно пред спиење, можеби е преуморно. Решение? Направете флексибилен распоред. Распоредот не треба да биде до минута, но може да биде вистински спас ако бебето не спие добро.
Пред да почнете да го менувате распоредот на вашето дете, водете дневник за будење и спиење неколку дена. Ова ќе ви помогне брзо да ја видите шемата за спиење на вашето дете.
Поставете го саканиот ритам. Во првите неколку месеци, добра идеја е да го ставите бебето во кревет приближно на секои 2 до 3 часа во текот на денот.
Разбудете го бебето после 2 часа бидејќи тоа помага да се одржи подолг ноќен сон. До првиот роденден дремењето ќе се стабилизира на секои 3 до 5 часа.
Почнете да го организирате денот на вашето бебе. Понекогаш преморените деца стануваат многу раздразливи. А откако еднаш детето ќе ја премине границата, добиваат уште повеќе енергија и се борат против спиењето.
- Бидете доследни
Експертите сакаат да ги предупредуваат новите родители: „Бидете доследни!“ Немојте да мислите дека пристапот треба да биде војнички, само обидете се да бидете доследни. Користете предвидливи, но едноставни знаци пред спиење: спуштете ги ролетните, понудете млеко и направете рутински подготовки. Првите неколку месеци се важни за градење на довербата и самодовербата на вашето бебе. Бидете доследни и почитувајте ја рутината. На тој начин треба да воспоставите шема на добро спиење.
