Истражувањето на Империјал колеџот во Лондон покажало дека две третини од учесниците во студијата биле се уште заразни по пет дена, а четвртина биле заразни и седум дена од првиот ден кога биле тестирани позитивно на коронавирусот.
Истражувањето открива колку долго трае заразноста по природна инфекција со коронавирус
Повеќето луѓе со благ КОВИД-19 сè уште се заразни пет дена по појавувањето на симптомите, сугерира студија, пишува „Sky News“. Тековните упатства на NHS (Националната здравствена служба на Обединетото Кралство) се дека луѓето треба да останат дома и да избегнуваат контакт со други лица пет дена.
Истражувањето открива колку долго трае заразноста по природна инфекција со коронавирус. Истражувачкиот тим спровел детални дневни тестови од моментот кога 57 луѓе биле изложени на вирусот за да се види колку се заразни за време на траењето на инфекцијата.
Истражувачите откриле дека:
- Просечното времетраење на заразноста било пет дена;
- Само еден од пет учесници бил заразен за околината пред да се појават симптомите на КОВИД-19;
- Две третини од случаите биле заразни пет дена по почетокот на симптомите;
- Една четвртина биле заразни и по седум дена.
Коавторот на студијата д-р Серан Хаки, од Националниот институт за срце и бели дробови на Империјал вели: „Повеќе не постои законска обврска за самоизолација ако сте позитивни на КОВИД-19, но повеќето луѓе и понатаму сакаат да се самоизолираат се додека не престанат да бидат заразни. Сепак, не е јасно кога е сигурно да се излезе од самоизолација. Нашата студија е прва што проценува колку долго трае заразноста, користејќи реални докази од природно стекната инфекција. Затоа, нашите наоди можат да обезбедат насоки за тоа како безбедно да се стави крај на самоизолацијата“. Тој додава: „Ако сте позитивни на КОВИД-19 или имате симптоми откако сте биле во контакт со лице со потврден КОВИД-19, треба да се обидете да останете дома и да го минимизирате контактот со други луѓе“.
