Дали е можно да се надмине стравот од тестови? Постојат неколку стратегии кои можат да ја намалат вознемиреноста пред тест и да ви помогнат да постигнете подобри резултати.
Мала нервоза пред тест е вообичаена и може да помогне во изострување на умот и фокусирање на вниманието. Но, кај анксиозноста која се јавува пред тест или испит, чувствата на загриженост и сомнеж во себе можат да ве спречат да дадете максимум и да ве направат несреќни. Оваа појава може да влијае на секого – без разлика дали сте ученик во основно или во средно училиште, студент или вработен кој треба да полага испити за напредок во кариерата или добивање некаков сертификат.
Еве неколку чекори што можете да ги преземете за да ја намалите анксиозноста:
Научете како да учите ефикасно. Вашето училиште можеби нуди часови за вештини на учење или други ресурси кои ќе ви помогнат да совладате методи за учење и совети за полагање тестови. Ќе се чувствувате поопуштено ако редовно учите и го вежбате материјалот што ќе биде на тестот.
Учете со време и на слични места. Многу подобро е да учите по малку во текот на подолг период отколку сè одеднаш. Исто така, поминувајте време учејќи на истото место каде што ќе го полагате тестот, или на некое слично место, за да ви помогне полесно да се сетите на информациите. Учењето на различни места исто така може да биде од помош.
За да останете смирени и полни со самодоверба непосредно пред и за време на тестот, практикувајте техники за релаксација. Тие вклучуваат длабоко дишење, наизменично стегање и опуштање на мускулите или затворање на очите и замислување позитивен исход
Воспоставете постојана рутина пред тестот. Дознајте што функционира за вас и следете ги истите чекори секој пат кога се подготвувате за полагање или правење тест. Ова ќе го намали нивото на стрес и ќе ве увери дека сте добро подготвени.
Разговарајте со вашиот наставник. Осигурете се дека разбирате што ќе има на секој тест и како најдобро да се подготвите. Исто така, кажете му на наставникот дека чувствувате вознемиреност кога имате тест. Тој можеби ќе има предлози кои ќе ви помогнат да бидете подобри.
Научете техники за релаксација. За да останете смирени и полни со самодоверба непосредно пред и за време на тестот, практикувајте техники за релаксација. Тие вклучуваат длабоко дишење, наизменично стегање и опуштање на мускулите или затворање на очите и замислување позитивен исход. Вежбајте ги овие методи секојдневно за да ви станат навика кога ќе дојде денот на тестот.
Вежбајте. Редовните аеробни вежби, како и вежбањето за време на периодот на учење и на самиот ден на испитот, можат да ја ослободат напнатоста.
Спијте доволно. Спиењето е директно поврзано со постигнувањето добри оценки во училиште. На децата и тинејџерите особено им е потребен редовен и цврст сон, но и на возрасните им е потребен добар ноќен одмор за да ги дадат своите најдобри резултати.
Не ги игнорирајте другите проблеми. Анксиозноста пред тест може да се подобри ако побарате помош за која било состојба што ја попречува способноста за учење или фокусирање, на пример, нарушување на вниманието со хиперактивност (АДХД), дислексија или други попречености во учењето. Во многу случаи, ученикот со ваква дијагноза има право на одредени видови помош при тестирање, како што е дополнително време, полагање во просторија со помалку пречки или читање на прашањата на глас.
Посетете професионален советник, доколку е потребно. Терапијата со разговор (психотерапија) со психолог или друг стручњак за ментално здравје може да ви помогне да се справите со чувствата, мислите и однесувањата кои ја предизвикуваат или влошуваат анксиозноста. Тие исто така можат да ве научат на вештини за учење, полагање тестови и организација, советуваат експертите од Мајо клиника.
