♦♦♦♦♦♦♦
ПИШУВА:
Ен Клејсон
програмски директор и вонреден професор по професионална
хигиена и здравје,
Универзитет во Манчестер
Глобалните епидемии на коронавирус ги затворија училиштата, спортските сали, канцелариите и други згради во размери кои никогаш претходно не се видени. Сега, откако земјите започнаа со повторното отворање, оние претходно (привремено) напуштени и затворени згради може да станат плодно тло за друга инфекција – Легионерска болест.
Легионерската болест е предизвикана од вдишување капки вода кои ја содржат бактеријата Legionella pneumophilia. Тоа е прилично ретко, но долгите периоди на неактивност во зградите за време на карантинот во голема мерка го зголемуваат ризикот од појава на нова епидемија.
Што е Легионерска болест?
Легионерската болест предизвикува тешка пневмонија. Всушност, нејзините симптоми лесно може да се помешаат со COVID-19. Тие вклучуваат треска, сува кашлица, краток здив и болка во мускулите.
За разлика од КОВИД-19, Легионерската болест не се шири од човек на човек, туку предизвикува појава на епидемија во заедница преку контаминирани капки вода во воздухот од извори како што се тушеви, чешми, разладни кули, системи за климатизација, спа-базени, џакузи и декоративни фонтани.
Легионерската болест предизвикува тешка пневмонија. Всушност, нејзините симптоми лесно може да се помешаат со COVID-19. Тие вклучуваат треска, сува кашлица, краток здив и болка во мускулите
Болеста може да биде смртоносна, и инфицира повеќе луѓе одеднаш. Неодамнешната епидемија во Северна Каролина бележи 124 лица кои се заразиле со болеста, а од нив четири лица умреле, откако поминале покрај контаминиран дисплеј на џакузи.
Бактеријата живее во топли средини, преживувајќи во биофилм. Сите системи за вода се изложени на ризик од ваквото предвидливо загадување кое може да се превенира, но привремено затворените/напуштени згради се особено изложени на ризик.
Тоа е затоа што повремената употреба на зградите и опремата и прекинувањето на режимите за чистење ја зголемуваат веројатноста за стагнација на водата, што за возврат ја зголемува веројатноста за појава на избувнување на епидемија на Legionella.
Кој е ризикот?
Во наредните месеци кога земјите повторно ќе се отворат, негативните резултати од тестовите за коронавирус кај оние кои имаат симптоми на грип и тешки респираторни симптоми треба веднаш да упатуваат на тестирање за Легионерска болест, а не само да се охрабруваат пациентите дека ќе закрепнат сами. Ова може да има големо влијание врз стапките на преживување и оздравување
Крајот на карантинот не може да дојде во полошо време за избувнување на потенцијална епидемија на легионела. Бактеријата Legionella „цвета“ во летните месеци, бидејќи оптималните услови за бактеријата се помеѓу 20-45 °C.
Уште позагрижувачки, државите кои имаа најстроги мерки во борбата против коронавирусот, и кои како резултат на тоа имаат голем број привремено „напуштени“, односно затворени згради, се државите каде оваа болест е најчеста. Франција, Германија, Италија, Шпанија, Велика Британија и Холандија учествуваа со 70% од сите случаи пријавени во Европа во 2017 година. Од нив, 10-15% од случаите имале фатален исход.
Во меѓувреме, САД, кои имаа широко распространети рестриктивни мерки, во последните 20 години доживеале пораст од 800% во пријавените случаи, веројатно затоа што влијанијата врз животната средина, како што се зголемените врнежи од дожд и потоплите температури, се во корист на растот на Legionella pneumophila bacterium.
Освен ризикот во јавните згради, постои потенцијален ризик и за зголемена домашна изложеност на легионела како резултат на пандемијата со коронавирус.
Трендовите за купување на потрошувачите покажуваат дека продажбата на џакузи се зголемува – еден онлајн-продавач објави зголемување на побарувачката за 1600% за време на карантинот. Како што покажува примерот на Северна Каролина, топлите кади – џакузи може да станат плодно тло за Legionella, доколку не се чистат или дезинфицираат правилно.
КОВИД-19 наспроти Легионерска болест
Ризик-групите за заболување од Легионерска болест се главно исти како кај КОВИД-19: во 90% од случаите заболуваат луѓе над 45 години, а две третини се мажи. Ако имате хронично заболување на белите дробови и други болести како што е дијабетес, се зголемува ризикот од сериозни заболувања од Легионерска болест, исто како што е случајот со КОВИД-19.
Но, стратегијата за борба против КОВИД-19 не е она што треба да се усвои кога станува збор за Легионерска болест.
На луѓето сомнителни на КОВИД-19 обично им се препорачува да се изолираат во период од 14 дена за да се спречи пренесувањето на болеста на други. Но, Легионерската болест не може да се пренесе од човек на човек и симптомите значително се влошуваат во период од седум дена. Бидејќи Легионерската болест е предизвикана од бактерии, навременото лекување со антибиотици е од витално значење. Одложувањето на третманот може да резултира во сериозна респираторна слабост.
Дополнителниот ризик од Легионерската болест кај оздравени пациенти со КОВИД-19 е моментално непознат. Пред-студиите на случаи на коронавирус во Кина и Јапонија откриле дека 20% од пациентите со КОВИД-19, исто така, биле заразени со бактеријата Legionella. Значи, се чини дека пациентите со коронавирус се поранливи на други инфекции стекнати во заедницата, како што е Legionella, и се изложени на ризик да се заразат во болница, бидејќи може лесно да се размножува во медицински објекти и опрема.
Во наредните месеци кога земјите повторно ќе се отворат, негативните резултати од тестовите за коронавирус кај оние кои имаат симптоми на грип и тешки респираторни симптоми треба веднаш да упатуваат на тестирање за Легионерска болест, а не само да се охрабруваат пациентите дека ќе закрепнат сами. Ова може да има големо влијание врз стапките на преживување и оздравување.
Како вашиот работодавец треба да ве чува безбедни
Легионелата може брзо да стане јавно здравствен проблем на секојдневните места како што се канцеларии, училишта, универзитети, здравствени установи и фабрики. Работодавците се законски должни да го заштитат здравјето на работниците од инфекција со Legionella.
Ризик-групите за заболување од Легионерска болест се главно исти како кај КОВИД-19: во 90% од случаите заболуваат луѓе над 45 години, а две третини се мажи. Ако имате хронично заболување на белите дробови и други болести како што е дијабетес, се зголемува ризикот од сериозни заболувања од Легионерска болест, исто како што е случајот со КОВИД-19
Бидејќи земјите излегуваат од карантин, мора да се направи сеопфатна проценка на сите системи за вода во просториите пред некој да се врати на работа. Ефективните програми за управување со водата во зградите, објектите и постројките ќе ја отстранат оваа закана по здравјето на луѓето.
Зголемувањето на комерцијалната и јавната свест за контролите на Legionella е клучно во долгорочната превенција на болеста. Национален и локален публицитет за ризиците од Легионерската болест при враќање на работа и во слободно време, заедно со упатства за безбедно повторно отворање на зградите треба да помогнат да се намали веројатноста за појава на епидемија на оваа болест. (The Conversation)
