Рускиот национален центар за микробиологија, „Николај Гамалеј“, планира да започне со испитувања на вакцината против COVID-19 врз деца во јануари или февруари наредната година. Директорот на Центарот, д-р Александар Гинзбург објасни дека според руските закони, вакцината мора да ги помине сите циклуси на тестирање на возрасни, па дури кога ќе се покаже ефикасна и безопасна може да почне да се тестира на деца.
„Сега работиме на потребниот пакет документи затоа што никогаш не сме правеле испитување на деца. Педијатрите ги знаат сите овие специфики и заедно со нив се обезбедуваат потребните документи, кои се потребни пред почетокот на истражувањето на вакцината кај децата“, изјави д-р Александар Гинзбург.
Третата фаза на тестирање кај возрасните ќе трае пет месеци. Во неа ќе бидат вакцинирани околу две илјади луѓе.
„Силно се надевам дека нашата вакцина ќе биде добра и за децата, но законот мора да се почитува, така што ќе почекаме прво да завршат сите фази на тестирање кај возрасните“, вели Гинзбург.
Директорот на Институтот на Универзитетот Сеченов, каде што се тестира вакцината, д-р Вадим Тарасов, вели дека е уште рано да се зборува за давање на вакцината на деца, но тие и онака не се кризна група на населението затоа што лесно го поднесуваат коронавирусот.
Министерот за здравство на Русија, Михаил Мурашко, најави дека ќе започне масовна вакцинација на најзагрозените групи – наставници и лекари во октомври. Во моментов, три фабрики за лекови во московскиот регион ги подготвуваат своите капацитети за големо производство на вакцина против COVID-19.
Досегашните испитувања во воената болница „Бурденко“ во Москва и Институтот „Сеченов“ дадоа добри резултати, вакцината го стимулира организмот да произведува антитела против корона. Кај доброволците не беа забележани никакви сериозни несакани ефекти.
Без оглед на тоа што ја фалат вакцината направена од центарот „Николај Гамалеј“, во Русија сега се спроведуваат клинички испитувања и на вакцината направена од научниот центар од Новосибирск „Вектор“. Таа вакцина би требало да започне да се произведува во октомври.
Тоа што први во светот ќе регистрираат вакцина против коронавирус за Русите е повеќе работа на престиж отколку комерцијален успех, бидејќи вакцината ќе биде значително поевтина од западните. (Вечерње новости)
