ПИШУВА:
Д-р Даница Поповска
специјалист по ортопедија
♦♦♦♦♦♦♦
Болките во мускулите се чести кај децата, главно во нозете. Тие се безопасни, но можат да бидат многу болни и непријатни. Вообичаено исчезнуваат околу 12 – тата година. Децата ги опишуваат како болки во бутовите и листовите, понекогаш и зад колената. Се јавуваат во двете нозе, најчесто навечер и до утрото се губат. Се појавуваат повремено во тек на повеќе месеци, понекогаш и години.
Се смета дека се појавуваат во периоди на брз раст на детето и се нарекуваат и болки на растење, иако не е докажано дека самиот раст ги предизвикува.
Ваквите болки се типично:
-
Болки во мускулите, никогаш во самиот зглоб или коската;
-
Обострани, ги зафаќаат двете нозе, поретко раце;
-
Децата ги опишуваат како болка или биење;
-
Обично се јавуваат по поинтензивна физичка активност;
-
Се јавуваат навечер, до утрото исчезнуваат и не ја ограничуваат активноста на детето.
Причините за овие болки се нејасни. Се смета дека замор од прекумерна употреба, како интензивно трчање и скокање може да биде една од причините. Мал број студии го наведуваат недостигот на железо во крвта како потенцијална причина, но кај голем број од децата со овие болки вредностите на серумско железо се нормални.
При посета на лекар, вообичаено е доволен само преглед за поставување на дијагнозата. Понекогаш се прават рентгенски снимки или лабораториски испитувања за да се исклучат други состојби.
Третман
Не постои специфичен третман за овие болки, но тие се безопасни, со време ослабуваат и исчезнуваат и не оставаат никакви последици. Во домашни услови, на детето можете да му помогнете со:
- Лесно триење или масажа на болните делови;
- Затоплување со термофор или шишиња со топла вода;
- Топла бања пред легнување;
- Избор на удобни обувки;
- При посилни болки може на детето да му дадете ибупрофен или парацетамол.
Понекогаш болките можат да бидат причинети и од друго заболување или состојба. Поради тоа, лекарски преглед е неопходен доколку болката е:
-
Само во едната нога или рака;
-
Започнала по повреда;
-
Придружена со покачена телесна температура;
-
Локализирана во зглоб или коска;
-
Придружена со видливи промени – оток, црвенило или модринки;
-
Предизвикува накривнување или детето одбива да оди.
