Соединетите американски држави веројатно нема да достигнат колективен имунитет додека не се вакцинираат децата, рече водечкиот американски епидемиолог д-р Ентони Фаучи.
Вакцинираните лица можат да го пренесат вирусот на други луѓе, па дури и да се инфицираат повторно, вели д-р Фаучи
„Ние навистина не знаеме која е таа магична точка на „имунитет на стадо“, но знаеме дека ако вакцинираме огромно население, ќе бидеме во добра форма“, изјави Фаучи. „Ултимативно би сакале и мораме да ги внесеме децата во тој микс“.
Д-р Фаучи, директор на Националниот институт за алергија и инфективни болести, рече дека проценува дека 70-85% од населението треба да биде вакцинирано или имуно за да се достигне колективен имунитет.
„Имунитетот на стадо“ се јавува кога голем дел од популацијата станува имуна на вирусот, преку вакцинација или инфекција, а вирусот нема каде да оди.
Претходно Фаучи изјави дека средношколците би можеле да почнат да се вакцинираат наесен, а помалите деца во почетокот на 2022 година, објави Си-Ен-Би-Си.
Во САД, вакцината на „Фајзер“ може да се дава на лица од 16 години и повеќе, а вакцините на „Модерна“ и „Џонсон и Џонсон“ на лица од 18 години и повеќе. Производителите на вакцини започнаа клинички испитувања на адолесценти и помали деца, но ќе поминат месеци пред да бидат познати резултатите.
Д-р Фаучи рече дека е загрижен за можниот 4. бран на Ковид-19, и покрај зголемувањето на вакцинациите. Тој исто така забележа дека бројот на случаи се зголемува во неколку европски земји.
„Европа е генерално околу 3 до 4 недели пред нас во динамиката на нивното избувнување“.
Д-р Фаучи објасни дека вакцинираните лица можат да го пренесат вирусот на други луѓе, па дури и да се инфицираат повторно. (WebMD)
