Д-р Ентони Фаучи, директор на Националниот институт за алергија и инфективни болести, рече дека смета дека децата од буквално секоја возраст би требало да можат да се вакцинираат против Ковид-19 до првиот квартал од 2022 година, и дека луѓето треба да продолжат да носат маски.
Фаучи повтори една точка што претходно ја кажа, дека би бил изненаден ако средношколците не можат да се вакцинираат до почетокот на есенското полугодие.
- „Мислам дека кога ќе стигнеме до првиот квартал од 2022 година, ќе можеме да вакцинираме деца буквално од која било возраст, се надевам и пред тоа, но мислам дека тоа ќе биде последниот термин“, рече тој за Си-Ен-Ен
Модерна и Фајзер во моментот ја тестираат вакцината кај деца од 12 години и помлади. Фајзер веќе достави до Агенцијата за храна и лекови на САД барање за проширена употреба на својата вакцина за деца од 12-15 години. Во моментов има овластување за лица на возраст од 16 години и постари.
Фаучи ја објасни и причината зошто луѓето треба да продолжат да носат маски, иако веќе примиле вакцина.
Прво, тој рече дека кога некое лице е вакцинирано, ризикот од заразување драматично се намалува и е многу мал. Сепак, постои ситуација кога некој може да се вакцинира, да нема клиничко заболување, но сепак да биде заразен без да знае за тоа. Потоа овие лица можат ненамерно да го пренесат вирусот на некој што не е вакциниран. (Си-Ен-Ен)
