ПИШУВА:
Д-р Маргарита Камбовска
специјалист педијатар неонатолог
♦♦♦♦♦♦♦
Најпрво да разјасниме што претставува покачена телесна температура кај дете – нормалната температура кај дете е до 37 степени целзиусови и по правило се мери аксиларно. Ректално мерење на температурата се избегнува, а нејзина нормална вредност изнесува и до 37,5 степени целзиусови. Се мери со дигитален топломер. Со помала точност се топломерите кои мерат температура на челото на детето.
-
Субфебрилна температура е од 37 до 38 степени целзиусови при која не препорачуваме давање на никакви медикаменти и не преземаме никакви методи за ладење на детето, само негово пратење;
-
Фебрилна температура е од 38 до 39 степени целзиусови, препорачуваме земање на предвид после педијатриски преглед давање на антипиретик доколку температурата оди над 38,5 степени;
-
Високо фебрилна температура е повисока од 39 или 39,5 (според некои автори) при која се дава антипиретик и секако се препорачува педијатриски преглед. Тука спаѓаат и случаите со телесна температура повисока од 40 степени целзиусови. СЕКАКО ТРЕБА БЕБЕНЦЕТО ИЛИ ДЕТЕТО ДА ГО ОДНЕСЕТЕ НА ПЕДИЈАТРИСКИ ПРЕГЛЕД.
Најчеста причина за покачување на телесната температура кај децата е инфективната причина. Тоа што родителите треба да преземат во ваква состојба се низа на мерки и постапки со кои ќе го разладат детето без притоа непотребно да го вознемират, а со самото тоа да ја влошат неговата состојба.
При фебрилна или високо фебрилна состојба прво го расоблекуваме детето, даваме антипиретик (сируп против температура). Доколку на тој начин сме го разладиле детето, потоа го носиме на педијатриски преглед. Кај повисоки температури може да се применат и други методи на ладење, како туширање со млака вода (никако со ладна, зашто на тој начин ќе предизвикаме шок кај детето. Целта е да ја намалиме телесната температура за еден степен.
При фебрилна или високо фебрилна состојба прво го расоблекуваме детето и даваме антипиретик (сируп против температура)
Секое нагло намалување на температурата за повеќе од еден степен може да биде критично. Понатаму го облекуваме со еден слој памучна облека и чекаме да делува антипиретикот. Ова се применува кај високо фебрилни состојби и немаме ограничување за бројот на повторување на истата метода.
Претходно препораките беа истото ова да се прави со 70 % медицински алкохол, меѓутоа се докажа дека не помалку ефикасна е методата со млака вода (обложување на кожата со микрокапкички кои по нивното испарување ја одземаат топлината на телото по пат на евапорација).
