Живееме во време на зголемен стрес. Светот каков што го знаеме претрпе драстична промена, а на тоа не се имуни ниту децата. Како што пишува „Kids Minds Matter“, исто како возрасните, и децата можат да бидат под стрес, само што симптомите не се толку очигледни. А можеби и се? Иако децата немаат секогаш емоционална интелигенција или вокабулар за да се изразат, емоционалните знаци или знаците на однесување можат многу добро да покажат дека се во стресен период и дека им е потребна помош.
Експертите објаснуваат дека стресот кај децата може да се манифестира преку промени во нивното типично однесување. Секоја возраст има различни симптоми, но некои од најчестите знаци се нерасположение или раздразливост, повлекување од активности во кои детето некогаш уживало, загриженост, жалење за градинка или училиште, плачење, покажување страв во ситуации од кои детето претходно не се плашело. Покрај тоа, детето е повеќе врзано за родителите и има промени во апетитот и спиењето.
Стресот кај деца од три до седум години
Оваа возрасна група под стрес би можела да покажува знаци на регресија. На пример, децата кои биле успешно научени да вршат нужда на нокширче или во тоалет, може ненадејно да се измократ во кревет или да се извалкаат додека го користат тоалетот. Детето може повторно да почне да го цица палецот.
Помалку е веројатно дека тинејџерите од 10 до 13 години ќе зборуваат за своите грижи и стравови, но експертите предупредуваат дека тоа не значи дека ги немаат
Исто така, може да има проблеми да обрне внимание на работите околу себе, да има напади на бес или да покажува вознемиреност од разделување. Може повторно да се појават борби околу јадењето и одењето на спиење.
Стресот кај деца од седум до 10 години
Оваа возрасна група е нешто посвесна за необичните времиња во кои моментално се наоѓаме. Тие може да се плашат за сопственото здравје, а често се грижат и за своето семејство бидејќи развиваат способност да ги земат предвид туѓите перспективи. Тоа најчесто се однесува на нивните баби и дедовци, но често и на нивните родители. На пример, тие можат да ги ослободат своите стравови во форма на гнев или голема раздразливост.
Иако децата немаат секогаш емоционална интелигенција или вокабулар за да се изразат, емоционалните знаци или знаците на однесување можат многу добро да покажат дека се во стресен период и дека им е потребна помош
Други симптоми се анксиозност, вознемиреност, а кај некои деца се забележува промена во однесувањето – дома се однесуваат на еден начин, но на училиште или со пријателите на сосема поинаков начин. Сето ова се знаци дека детето поминува низ стресен период и дека му е потребна помош.
Стресот кај тинејџери од 10 до 13 години
Оваа возрасна група е во таа единствена фаза кога почнуваат да се појавуваат бунтовност и непослушност. Родителите на децата на оваа возраст најчесто забележуваат избегнување или бегање од часови, послаби оценки или постојан отпор кон извршување на домашната задача или завршување на некоја друга задача што им е доделена.
Помалку е веројатно дека децата од оваа возрасна група ќе зборуваат за своите грижи и стравови, но експертите предупредуваат дека тоа не значи дека ги немаат.
