Данска студија објавена вчера открива дека маските за лице обезбедуваат ограничена заштита против коронавирусот, но нагласува дека тоа не треба да биде аргумент против нивната широка примена за спречување на ширењето на инфекцијата.
Студијата е спроведена во април и мај оваа година, а опфатила 6024 возрасни лица. Дел биле во група која носела маски, а дел во контролна група.
По еден месец, се заразиле 1,8 проценти од оние кои носеле маски и 2,1 процент од оние во контролната група, информираше Универзитетската болница во Копенхаген.
“Студијата не го потврдува очекуваниот двојно помал ризик од инфекција за луѓето кои носат маски. Резултатите би можеле да укажуваат на малку поумерено ниво на заштита од 15 до 20 проценти“, се наведува во истражувањето.
Меѓутоа, како што покажале и некои претходни истражувања, додека маската обезбедува само ограничена заштита за оние кои ја носат, таа може драстично да го намали ризикот за другите луѓе доколку ја носи заразеното лице, дури и кога не покажува симптоми.
Авторите наведуваат дека резултатите од студијата “не би требало да се користат за заклучоци дека препораката за носење заштитна маска во заедницата не е ефикасна во намалување на инфекцијата со коронавирусот, бидејќи во истражувањето не се тестирала улогата на маската во контрола на изворот на зараза со коронавирусот“.
