За подобро да ги информираат своите граѓани, властите во Данска воведоа практика секоја вечер преку онлајн медиумите експертите да одговараат на прашања поставени од народот во врска со Covid-19. Кои се најчесто поставуваните прашања во врска со коронавирусот и каков е одговорот на данските епидемиолози, за „Бука“ пренесува д-р Наташа Лонарчевиќ, доктор на медицина и специјалист за јавно здравје, која живее и работи во Данска.
♦♦♦♦♦♦♦
Зошто сите не се тестираат?
Тоа се прави во првата фаза на обидот да се забави инфекцијата со цел да се добие на време. Потоа се преминува кон стратегија на ублажување, каде што фокусот е ставен на избегнување на ширење на инфекцијата колку што е можно, а особено на стари лица и лица со хронични заболувања. Во оваа фаза не е целисходно да се тестираат сите луѓе, бидејќи повеќето од нив ќе имаат благи симптоми и само треба да останат дома сè додека не бидат повторно здрави.
Како се одвива развојот на болеста и оздравувањето?
Обично, после една недела, повеќето ќе бидат повторно здрави, но кај помал процент вирусот ќе ги зафати белите дробови и можеби ќе им треба болничко лекување. Меѓутоа, и во вакви случаи, повеќето од нив ќе оздрават.
Колку долго е потребно да се продолжи со социјално дистанцирање: до крајот на епидемијата или и после тоа, за да се избегне нова епидемија?
Штом ќе помине епидемијата, нема причина да останеме изолирани, бидејќи е многу низок ризикот од инфекција. Но, треба да се продолжи со добра хигиена на рацете како добра практика.
Дали сум имун ако сум ја прележал инфекцијата со коронавирус?
Имунитетот веројатно се гради, но во моментот не знаеме колку време е потребно за тоа. Можеби е потребно неколку месеци и потоа, ако повторно се заразите, симптомите можеби ќе бидат нешто поблаги.
Дали коронавирусот може да предизвика долгорочно оштетување на човечкиот организам? Данските експерти не можат да дадат конечен одговор, бидејќи вирусот е откриен пред само 2,5 месеци и се уште доволно не се познава
Во Италија заразен 38-годишен маж беше во кома, значи не се работи само за постарите лица и хронично болните пациенти?
Најголемиот број на луѓе кои сериозно се разболеле или починале откако се заразиле се постари лица (+80) или луѓе со една или повеќе сериозни болести. Се разбира, тоа не значи дека и помладите луѓе не можат сериозно да се разболат. Неколку фактори се клучни, но најстарите и хроничните пациенти имаат најголем ризик.
Може ли болеста да се пренесе преку храната?
Не. Освен ако некој е болен и кашла директно во храната, а потоа другата личност ја стави во устата и го внесе вирусот во дишните органи. Но, ова е теорија и ваквите ситуации треба да се избегнуваат така што ќе водите сметка за хигиената кога работите со храна. Заразата се пренесува преку капки кога некој кашла или преку контакт како што е ракувањето. Затоа треба да се води грижа за хигиената.
Прослава на роденден налето, доење, долгорочно оштетување на организмот…
Еден Данкинка беше заинтересирана дали може да го слави роденденот во април, а одговорот од епидемиолозите гласеше дека е подобро да ја остави роденденската забава за налето. Понатаму, мајка на три деца, од кои едното има само три месеци, рече дека има симптоми на грип и праша што да прави. И беше советувано да носи маска кога го дои бебето, да води грижа за хигиената на рацете, а таткото да ја преземе грижата за двете постари деца. Докторите ја потсетија дека кај помалите деца симптомите се благи и нема причина за претерана грижа.
Граѓаните ги интересираше и дали коронавирусот може да предизвика долгорочно оштетување на човечкиот организам, на што данските експерти не можеа да дадат конечен одговор, бидејќи вирусот е откриен пред само 2,5 месеци и се уште доволно не се познава, пренесува д-р Лонарчевиќ.
