Иако времето за враќање на старата тежина е различно за секоја жена и зависи од бројни фактори (во зависност од тоа колку килограми сте добиле за време во бременоста, дали доите или не, каква е вашата исхрана и дали вежбате), постојат одредени пресвртници што можете да ги означите во вашиот календар.
24 часа по раѓањето
Жените губат во просек по 5,5 килограми речиси веднаш по породувањето. „Тука е бебето, изгубената крв, течностите, плодовата вода“, вели нутриционистката Сара Б. Кригер, која работи со бремени жени и мајки. „Во овој период од 24 часа, вашиот постпородилен стомак веќе почнува да се намалува“, додава таа. Со други зборови, голем дел од тежината од бременоста е самото бебе.
Една недела подоцна
„Сè уште губите многу течност во форма на урина, особено ако сте имале епидурална“, вели нутриционистот Кригер, што значи дека сè уште слабеете, но таа советува да не се мерите: „Фокусирајте се на тоа како ви стои облеката, а не на она што го кажува вагата“.
Доењето исто така игра улога во слабеењето. Иако на жените им се советува да внесуваат дополнителни 500 калории дневно доколку дојат, тие често губат многу килограми по породувањето токму поради доењето. „Жените слабеат од доењето бидејќи доењето бара и „зема“ калории“, вели гинекологот Ешли Роман. Но, нутриционистот Кригер нагласува дека ова не важи за сите: „Некои жени ќе ослабат повеќе од другите, без разлика дали дојат или не“.
Две недели подоцна
Нутриционистот Кригер верува дека новите мајки не треба да се мерат во првите две недели по породувањето, кога можеби сè уште воспоставуваат рутина за доење, а хормоните штотуку почнуваат да се смируваат. Со други зборови, се уште сте во таканаречениот „бејби блуз период“, каде бројките на вагата би можеле да ве вознемират и многу лесно да ве расплачат. Таа исто така додава: „Бројот на вагата обично не е вистински одраз на вашата тежина, затоа не се обесхрабрувајте“. Кригер препорачува еднаш месечно да ја мерите половината со кројачко метро за да ги следите сантиметрите, а не килограмите.
Еден месец подоцна
Можеби звучи премногу добро за да биде вистина, но вообичаено е новите мајки да изгубат околу 9 килограми во првиот месец по породувањето. Бидејќи на повеќето жени им се советува да добијат 11-15 кг за време на бременоста, еден месец подоцна, многу е веројатно дека речиси ќе ја вратите тежината пред бебето.
Шест недели подоцна
Матката целосно се враќа во карличната празнина, а вашиот стомак изгледа порамно и помало. „Ова е голема промена кога станува збор за постпарталниот стомак“, вели Кригер.
Неколку месеци подоцна
Ако ги задржите здравите навики во исхраната кои сте ги следеле за време на бременоста, блиску сте до вашата нормална тежина. Доколку сакате да го забрзате процесот, вежбањето секако ќе ви помогне во тоа.
Девет месеци подоцна
Кригер тврди дека има вистина во често употребуваната фраза „9 месеци нагоре, 9 месеци надолу“. Но, ако сте се добиле повеќе од препорачаните 11 до 15 кг, ќе ви треба уште малку за повторно да изгледате како старото јас. Издржете!
