Научниците ширум светот ги истражуваат можностите за развој на вакцина против COVID-19, а Светската здравствена организација во моментов следи над 170 потенцијални кандидати.
Иако вообичаеното време за развој на нова вакцина се брои во години, а потоа е потребно дополнително време пред вакцината да се појави на пазарот, научниците во овој случај се надеваат дека вакцината против новиот коронавирус ќе се развие за 12 до 18 месеци, пишува „Гардијан“.
Вакцините всушност го имитираат вирусот, или дел од вирусот, поттикнувајќи го имунолошкиот систем да развие антитела. Со оглед на фактот дека вакцината ја користат милиони луѓе, безбедносните стандарди мора да се почитуваат.
Како се тестираат вакцините?
- Во пред-клиничката фаза на тестирање, научниците ја тестираат вакцината врз животни за да видат дали воопшто поттикнува одговор на имунолошкиот систем.
- Во првата фаза на клиничко тестирање, вакцината се дава на мала група на луѓе за да се утврди безбедноста и да се дознае повеќе за одговорот на имунолошкиот систем.
- Во втората фаза, вакцината се дава на стотици луѓе за да се добијат поконкретни одговори за точната доза.
- И, конечно, во третата фаза, вакцината им се дава на илјадници луѓе за да се потврди безбедноста, вклучително и ретки несакани ефекти, но и ефикасност. Оваа фаза вклучува и контролна група која добива плацебо.
Вакцини во клинички фази
Како што пишува „Гардијан“, пет тима научници ширум светот ја завршиле втората фаза на клинички испитувања и влегле во третата. Тоа се Универзитетот во Оксфорд/AstraZeneca; BioNTech/Fosun Pharma и Pfizer; Novavax; CanSino Biologics Inc./Институтот за биотехнологија во Пекинг; и Универзитетот во Мелбурн/Murdoch Children’s Research Institute.
