Исто како и кај возрасните, и кај децата може да дојде до појава на вртоглавица. Иако постојат различни видови на вртоглавица, кај децата најчеста е онаа која се јавува по нагло станување од лежечка или од седечка положба? Но, дали е тоа знак за нешто сериозно или е минлива состојба?
Кога детето лежи, голема количина на крв доаѓа во главата, па така и во мозокот – бидејќи тој се наоѓа во линија со срцето, кое пумпа крв. Ако детето нагло стане од кревет, доаѓа до сливање на крвта од горните делови на телото (па и од главата) во долните делови, при што мозокот привремено останува без доволна количина на крв. Со намалената количина на крв доаѓа и до недостаток на кислород, без кого мозокот не може да работи. Затоа тој се брани, и тоа со вртоглавица – која не тера да се вратиме во хоризонтална положба и така да го поправиме дотокот на крв и на кислород.
Зошто ова не се случува и на некој друг?
Или другите не сакаат да признаат, или имаат малку посилен кардиоваскуларен систем. Оваа вртоглавица почесто се јавува кај девојчињата, но и кај оние деца кои имаат низок крвен притисок. Ако, на пример, мајката има низок притисок, постои реална можност дека таков да биде случајот и со детето. Затоа, измерете му на детето притисок. Сигурно ќе биде понизок.
Дали може да дојде до сериозно нарушувања?
Не може, ако се исклучи пад од кревет или незгодно удирање со главата – што, сепак, ретко се случува.
Како да им помогнете?
Прво, наутро нека не скокаат од кревет! Малку нека поседат на креветот, нека се истегнат, па полека да станат. Дури потоа нека отидат во тоалет, да се средат, па веднаш да појадуваат, затоа што појадокот е најважниот оброк.
Во текот на денот треба редовно да земаат доста течности и би било добро да се занимаваат со некој спорт. Така ќе го решите овој, не многу опасен, но непријатен проблем.
