Кај многу деца забележливи се промени на пролетта – тешко стануваат наутро, се проѕеваат на училишните часови, не можат да се концентрираат, брзо се заморуваат и речиси можат да заспијат стоејќи. Покрај тоа, кај некои од нив се забележува и бледило на кожата, која понекогаш се лупи.
Родителите обично прво мислат дека се работи за недостаток на некои витамини, па посегнуваат по некои суплементи, но педијатарот д-р Лусин Авакиан истакнува дека витамините немаат никаква врска со ова.
Докторката истакнува дека овој пролетен замор има многу повеќе врска со адаптацијата на телото на климатските промени отколку со витамините.
Недостаток на витамини
Авитаминоза е медицински термин за многу сериозна состојба поврзана со голем недостаток на витамини во телото. Пример е рахитисот, кој се јавува поради сериозен недостаток на витамин Д, но тоа денес е реткост.
Почеста е хиповитаминоза или умерен недостаток на одредени витамини, што може да предизвика некои симптоми, но д-р Авакиан истакнува дека тоа не е толку опасно како авитаминозата.
Пролетен замор
Во пролет, телото на детето навистина минува низ период на адаптација: климатските услови се менуваат, часовникот се поместува, активноста се зголемува и исхраната се менува. Сето ова може да предизвика замор, поспаност и промени во расположението, но обично не е поврзано со недостаток на витамин.
Важно е да се знае дека сезонските промени можат да влијаат на функционирањето на нервниот и имун систем, па понекогаш недостатокот на енергија или промените во расположението се природна реакција на телото, а не знак на болест и како такви не бараат медицински третман.
Сепак, педијатарот истакнува дека е можно по зимата кај возрасните и децата навистина да се јави недостаток на некои витамини, а најчесто во прашање се:
Витаминот Д, кој најмногу се апсорбира преку сончевата светлина, која е помалку достапна во текот на зимата. Д-р Авакијан истакнува дека тоа може да доведе до чувство на слабост, намален имунитет и пониско расположение. Ако вашето дете не е доволно изложено на сонце, вашиот педијатар може да препише додатоци на витамин Д.
Витаминот Ц го поддржува имуниот систем и му помага на телото да се бори против вирусите. Иако во зима има помалку свежо овошје и зеленчук, недостатокот на овој витамин е редок. Меѓутоа, ако детето има монотона исхрана и јаде малку свежа храна, не сака овошје и зеленчук, тогаш нивото на витамин Ц во неговото тело може да се намали, што ќе доведе до зголемен замор и склоност кон чести настинки, особено во периодот на транзиција помеѓу годишните времиња.
Витамините Б и витаминот А учествуваат во метаболизмот, влијаат на состојбата на кожата, косата и нервниот систем. Во пролет, нивното ниво може да се намали, особено ако исхраната на детето била монотона и немало месо, млечни производи, јајца и житарки, кои се главните извори на овие важни материи.
Не му давајте на детето витамини на своја рака
„Да се земаат витамини на своја рака, без лекарски преглед, е честа грешка. Вишокот витамини, особено растворливи во масти (А, Д, Е, К), може да биде штетен и да доведе до несакани последици. На пример, земањето премногу витамин Д може да предизвика зголемување на нивото на калциум во крвта, што е опасно за здравјето, бидејќи може да предизвика проблеми со бубрезите и крвните садови. Затоа, пред да му дадете витамини на детето, консултирајте се со лекар. Ако постојат очигледни знаци на хиповитаминоза, како што се постојана слабост, кршливи коса и нокти, сува кожа, пукнатини на аглите на устата, зголемена зачестеност на настинки, педијатар може да побара тестови и да одреди витамини кои одговараат на индивидуалните потреби на организмот на детето“, вели д-р Авакиан.
Таа вели дека за оптимално здравје и баланс на витамини во организмот, детето треба да јаде разновидна исхрана, секој ден да поминува време надвор – по можност во сончевиот дел од денот, да биде физички активно и да има дневна рутина, која вклучува доволно спиење.
