Децата се помалку заразни од нивните родители и на тој начин помалку го поттикнуваат ширењето на коронавирусот, покажале прелиминарните резултати на студијата што ја претстави проф. д-р Клаус Мајкл Дебатин, директор на Детската клиника на универзитетот во Улм – Германија.
За оваа студија, научниците од четири германски универзитетски клиники – Улм, Хајделберг, Фрајбург и Тибинген – од април тестирале околу 2.500 деца и нивните родители на антитела на коронавирусот.
Според проф. д-р Дебатин, ова е досега најголема студија во светот на оваа тема, која тој и официјално ја презентираше на прес конференција на владата на сојузната покраина Баден Виртенберг, која одлучи повторно да ги отвори училиштата од 29 јуни.
Научниците со своите сознанија предизвикаа внимание, особено во медицинската јавност, негирајќи ги претходните претпоставки за децата и новиот коронавирус.
Имено, еден од највлијателните вирусолози во Германија, Кристијан Дростен кон крајот на април тврдеше дека децата се еднакво заразни како и возрасните, со што предупреди на опасноста од повторно отворање на училиштата.
Можната причина зошто децата помалку го шират коронавирусот може да се пронајде во тоа дека тие имаат помали “рецептори“ на кои вирусот може да се закачи. Нивниот имун систем во грлото е посилен во одбрана од коронавирусот, наведуваат научниците.
Проф. Дебатин истакна дека е јасно дека децата значајно помалку заболуваат од новиот коронавирус, и дека проблемот во студијата на вирусологот Дростен е погрешна интерпретација.
