Случајот на тригодишното девојче Бруклин-Мај, кое според нејзината мајка Шарлот Вингфилд, се заразило со салмонела во чоколадото Киндер и за малку ќе умрело неодамна го шокираше светот. Но, ова не е единствениот случај во последните денови. Во изминатата недела дел од производите на италијанскиот производител беа повлечени од продавниците низ Европа, поради страв од салмонелоза, а според последните податоци потврдени се десетици случаи на труење.
Салмонелата е бактерија која предизвикува инфекции кај животните и луѓето. Кај луѓето предизвикува различни клинички слики на цревни инфекции (воспаление на гастричната и цревната слузница со повраќање, дијареја – акутен гастроентероколитис, тифусна треска, паратифус, бактериемија со или без цревни жаришта, сепса). Болестите предизвикани од бактерии од родот салмонела се нарекуваат салмонелоза.
КАКО СЕ ПРЕНЕСУВА САЛМОНЕЛАТА?
Тоа најчесто се случува кога храната е недоволно термички обработена (месо и производи од месо, млеко и млечни производи, јајца и производи приготвени од нив – креми, колачи, сладолед).
Салмонелата живее во цревата на луѓето и животните. Луѓето можат да добијат инфекција со салмонела од различни извори, вклучително:
- Јадење контаминирана храна или пиење контаминирана вода.
- Допирање на заразени животни, нивниот измет или нивната околина.
ПРВИ СИМПТОМИ
Првите симптоми на инфекција може да се појават 30 минути до три дена по консумирање на контаминирана храна. Повеќето луѓе со инфекција со салмонела имаат дијареја, треска и стомачни грчеви. Меѓу најчестите симптоми се:
- слабост
- повраќање
- дијареја
- абдоминални болки и грчеви
- главоболка
- температура
- слабост
- крв во столицата
Болеста обично трае 4 до 7 дена. Дијарејата може да биде изразена и во тешка форма, па задолжителна е препораката да се побара лекарска помош. Старите лица, доенчињата и оние со оштетен имунолошки систем може да имаат потешка форма на болеста. Кај овие категории на луѓе, инфекцијата може да предизвика тешки компликации па дури да заврши и летално доколку не се третира соодветно, се вели на веб-страницата на Агенцијата за храна и ветеринарство
ЗНАЦИ НА СЕРИОЗНА ИНФЕКЦИЈА
Клиничката слика може да варира од блага до тешка која бара хоспитализација. Честата дијареја и повраќање може да предизвикаат големи загуби на течности и електролити. Потешка клиничка слика значи дека дошло до дехидрација, манифестирана со сува уста, сув јазик обложен со бели облоги, потемна урина и забрзано чукање на срцето.
Исхраната игра важна улога во лекувањето на салмонелата, па менито треба да се состои од чаеви (нане, камилица), минерална вода, солена супа (поради електролитите), јогурт и немасно месо.
Кој има поголема веројатност да добие инфекција и тешка болест?
- Децата под 5 години имаат најголема веројатност да добијат инфекција со салмонела.
- Доенчињата (деца помлади од 12 месеци) кои не се доени имаат поголема веројатност да добијат инфекција со салмонела.
- Доенчињата, возрасните на возраст од 65 години и постари и лицата со ослабен имунолошки систем имаат најголема веројатност да имаат тешки инфекции.
- Луѓето кои земаат одредени лекови (на пример, редуктори на киселина во желудникот) се изложени на зголемен ризик од инфекција.
Како се дијагностицира инфекцијата со салмонела?
Инфекцијата со салмонела се дијагностицира со лабораториски тест, кој ја детектира бактеријата салмонела во столицата (изметот), телесното ткиво или течностите на една личност.
