Стручњаците сметаат дека ова може да биде чекор кој ќе успее да ја контролира пандемијата. Вакцините кои во моментив се достапни, наменети се за лица постари од 16 или 18 години. Според овие податоци, јасно е колкав процент од населението не е во можност да прими вакцина.
ДЕЦАТА КОИ НЕ СЕ ВАКЦИНИРАНИ ПОТЕНЦИЈАЛНО МОЖЕ ДА ГО ШИРАТ ВИРУСОТ
Додека младите луѓе и децата остануваат невакцинирани, јасно е дека претставуваат потенцијална закана во смисол на ширење на коронавирусот.
“Децата можат да го шират вирусот како и возрасните, па нивното вакцинирање ќе помогне во намалување на бројот на заразени“, појаснува Ана Мунана, од Одделот за јавно здравје во Чикаго.
Лекарите не се сигурни колку долго децата можат да го шират вирусот откако биле изложени на него, но се верува дека се работи за истиот период како и кај возрасните.
ДЕЦАТА СЕ ВАЖЕН ФАКТОР ЗА ПОСТИГНУВАЊЕ НА КОЛЕКТИВЕН ИМУНИТЕТ
Со оглед дека децата може да бидат тие поради кои ќе се одржува живиот вирус во заедницата, експертите сметаат дека треба и тие да се вакцинираат и за да се постигне колективен имунитет. Колкав процент од децата треба да се вакцинираат сè уште не е познато.
“Јас би рекол дека тоа е 60 до 90 проценти од децата“, вели Никол Камби, професор по микробиологија, додавајќи дека треба да има што повеќе вакцинирани деца, особено поради новите варијанти на вирусот кои можат да се шират уште побрзо.
Тука е и реалноста која вели дека не секој возрасен ќе се вакцинира, или од избор или од здравствени причини. За некои тоа се алергии, а за други одлуката да не се вакцинираат од некоја за нив позната причина.
ЗОШТО СЕ ПОТРЕБНИ УШТЕ ИСТРАЖУВАЊА?
Денес, клиничките истражувања вклучуваат деца постари од 12 години, па планот е да се тестираат и помлади, ако овие тестирања поминат во најдобар ред.
“Етичкиот начин за работа на студиите е оној кога се почнува со постари деца и полека се преминува и на помлади. Мора предвид да се земе безбедноста на децата кои се тестираат. Потребни се дополнителни мерки на заштита кога се спроведуваат истражувања над деца, за да бидат заштитени нивните интереси“, појаснува д-р Џон Бестер, директор на одделот за биоетика на Универзитетот во Невада. Иако сличен на оние кај возрасните, имунитетот кај децата може во голема мера да се разликува, а тоа е јасно според многу помалиот број на заразени помеѓу децата и симптоми кои се јавуваат.
“Важно е да се препознае дека децата не се возрасни и потребна е многу работа за клиничките студии да покажат која е вистинската доза и што се случува со имунитетот“, нагласува д-р Бади Креч, директор на Центарот за истражување на вакцини на Универзитетот Вандербилт.
Експертите ќе речат дека поентата на сето тоа е – колку повеќе луѓе се вакцинираат, толку подобра ќе биде сликата.
„Само што почнавме да учиме кои можат да бидат долгорочните компликации на болеста и како одминува времето, ќе видиме како сме влијаеле на ширењето на инфекцијата“, додава тој. И нагласува дека не знаеме какво возрасните, но и какво децата кои се опоравиле од КОВИД-19, ќе имаат здравје по неколку години. Поради оваа причина, важно е да се вакцинираат што повеќе луѓе, а тука спаѓаат и деца.
