Температурата е многу честа појава кај малите деца и обично трае најмалку три до четири дена. Поранешната болничарка Ники Јуркуц, предупредува дека родителите често прават две големи грешки кога станува збор за лекување на треска кај малите деца.
„Запомнете, треската е природна реакција на телото на инфекција. Ако вашето дете делува добро и се чувствува добро, нема потреба да ја лекувате температурата додека не надмине 38,5 степени Целзиусови“, објаснува таа на својата палтформа Tiny Hearts Education.
Освен тоа, Јуркуц предупредува дека давањето аспирин на децата кои имаат грип или сипаници може да доведе до развој на Рејев синдром, кој може да биде фатален или да предизвика сериозни проблеми со мозокот.
Симптомите на Рејевиот синдром може да се појават една до три недели откако детето ќе закрепне од вирусот. Симптомите вклучуваат збунетост, поспаност, недостаток на енергија, промени во однесувањето како што се раздразливост или агресија, забрзано дишење и пулс, напади и губење на свеста.
Детската болница Great Ormond Street советува да не се дава аспирин на деца пред 16-годишна возраст, освен ако вашиот лекар не ви каже поинаку.
Втора грешка што родителите може да ја направат кога нивното дете има тпокачена температура е капење во студена бања или туширање за да се обидат да ја намалат температурата.
„Важно е детето да не се олади премногу брзо. Ставањето бебе или дете под ладен туш е вознемирувачко и може да предизвика хипотермија, при која доаѓа до пад на телесната температура под 35 степени Целзиусови“, наведува Јуркуц.
Симптомите на хипотермија вклучуваат треперење, бледа, студена и сува кожа, нејасен говор, забавено дишење, замор или збунетост. Бебињата со хипотермија може да бидат ладни на допир, млитави, невообичаено тивки или поспани и може да одбијат да се хранат.
КАКО ДА СЕ ТРЕТИРА ТЕМПЕРАТУРАТА?
Јуркуц напоменува дека е клучно да се третираат симптомите, а не бројот на термометарот. Таа исто така истакнува дека е важно да се внимава на одржување на хидрираноста на детето.
„Доколку температурата надминува 38,5 степени Целзиусови, можете да му дадете на детето парацетамол или ибупрофен, но за ова консултирајте се со педијатарот“, вели таа.
Парацетамол не треба да се дава на дете помладо од два месеци, додека ибупрофен не е наменет за деца помали од три месеци, оние со телесна тежина под пет килограми и оние со астма, освен ако не е препорачано од лекар, пишува Националната здравствена служба на Велика Британија.
Јуркуц наведува и пет околности во кои треба да побарате помош за вашето дете:
- Кога температурата е над 38 Целзиусови степени за бебиња под три месеци
- Кога детето е дехидрирано, не пие и има помалку влажни пелени
- Кога детето има осип што не поминува со притисок
- Кога детето изгледа поспано
- Кога детето има напади
