![16](https://pedijatar.mk/wp-content/uploads/2024/07/16-696x464.jpg)
Самодовербата е многу важна за децата бидејќи може да влијае на нивниот живот во сите аспекти. Добра вест е дека постои еден збор што може да им помогне на децата да имаат поголема самодоверба, а во прашање е зборот – вежба.
Кога сакаат да поттикнат чувство на самодоверба кај децата, родителите често им велат дека мора да пробаат нешто, но многу подобро е да се користи зборот вежба, а еве и зошто. Зборот обид упатува на неуспех или, во најмала рака, на сомневање дека детето ќе успее во нешто. Децата уште од мали слушаат дека мора да пробаат ова и она, мора да пробаат нешто одново. Исто така, психолозите велат дека зборот „обид“ во децата буди прашање што ќе се случи, а не им влева јасна намера да успеат во нешто.
Кога ќе размислите, којзнае колку пати и самите сте слушнале некој да каже дека пробал нешто повторно и повторно и не успеало. Или, дека ќе се обиде да најде време да дојде кај вас, па никогаш не се појавил?
Експертите истакнуваат дека потсвеста ни кажува дека обид е зборот што го користиме кога не очекуваме успех или не сакаме да направиме нешто. Од друга страна, зборот вежба укажува на подобрување и успех, бидејќи вежбата во се, секогаш не прави подобри.
Секој кој е добар во нешто морал да вежба – лекари, музичари, спортисти, говорници, пејачи…
За родителите кои сакаат да го исфрлат зборот „обид“ или „проба“ од својот речник, што животниот тренер Кели Рудолф од срце им го препорачува, нејзиниот совет е да ги заменат со фрази кои повеќе се фокусирани на успехот. На пример, можете да кажете „направи го тоа и види дали ќе ти се допадне“. Или „ајде да погледнеме и да видиме дали тоа е нешто што сакаш да го направиш“.
Овие алтернативни фрази ги немаат истите негативни асоцијации како зборот „обид“, па во таа смисла подобро влијаат на самодовербата на детето, смета таа.
Таа подвлекува дека зборот обид предизвикува сомнеж и упатува на неуспех, додека зборот вежбање значи дека нешто ќе вежбаме и на крајот ќе успееме. Зборувајќи за тоа колку е моќно вежбањето, таа истакнува дека децата вежбаат и кога учат да одат.
„Тие имаат намера да чекорат успешно, па вежбаат додека не успеат, а тоа само по себе е огромна лекција за нас возрасните“, заклучува.