Советите на познатиот српски академик, психијатар и писател Владета Јеротиќ и денес се актуелни, особено кога станува збор за темите брак, семејство и воспитување на децата.
Едно од неговите предавања, кое често се споделува меѓу родителите, се однесува на раното воспитување и формирањето на карактерот кај децата. Јеротиќ нагласува дека голем дел од личноста на човекот се обликува токму во најраните години од животот.
„Постои една стара поговорка која вели дека човек е даден и зададен. Тоа значи дека дел од она што сме го носиме со генетиката уште во пренаталниот период. Но, огромно значење има и воспитувањето во првите години од животот“, објаснувал академикот.
Според него, многу психолози се согласуваат дека карактерот и основната психолошка структура на личноста се формираат во првите три години од животот, а најдоцна до петтата година. Во тој период најголема улога има семејството, односно односот на детето со мајката и таткото.
Поради тоа, Јеротиќ сметал дека уште на тригодишна возраст децата треба да добијат мали обврски, кои ќе им помогнат да развијат чувство за независност и одговорност.
„Многу е важно децата на таа возраст да имаат некои свои обврски. Ако се справат добро со нив, треба да бидат пофалени. Децата треба да се пофалат дури и кога не го направиле сè совршено“, истакнувал тој.
Тој советувал родителите да покажат трпение и разбирање во процесот на учење. Наместо карање, подобро е задачата повторно да им се покаже на децата, сè додека не ја совладаат.
„Ако детето не направи нешто добро, не треба да се кара. Покажете му повторно, по втор или третпат. Кога конечно ќе успее, тогаш пофалете го“, порачувал академикот Јеротиќ.
