Експертите со години предупредуваат на проблемите предизвикани од прекумерната употреба на паметни телефони кај децата, особено кај најмладите. А какви можат да бидат последиците кога децата наместо родителите, ги воспитуваат екраните, најдобро можеме да видиме од резултатите од истражувањето спроведено од британската организација Kindred Squared меѓу наставниците и воспитувачите во предучилишните и училишните установи.
Без оглед на возраста, во истражувањето се нагласува дека резултатите се загрижувачки бидејќи многу деца се мачат со, како што ги нарекоа, основните животни вештини.
Некои се сè уште во пелени – околу една четвртина од нив не се научени самостојно да користат тоалет и често им се случуваат „незгоди“ во училиште, а нешто помалку од 30 проценти не можат самостојно да јадат и да пијат, што се прилично поразителни податоци.
Научните истражувања покажуваат дека првите три години од животот се критични за формирање на невронските врски. Во овој период мозокот е исклучително пластичен: секое искуство, интеракција и стимул ја обликува архитектурата на мозокот
Кога ќе тргнат во предучилишна установа, што е на возраст од 4-5 години, третина од децата во Велика Британија не знаат правилно да ги користат книгите, односно интуитивно да ги вртат страниците и да се служат со нив како објект за читање и проучување на содржината. Наместо тоа, некои дури се обидуваат да ги „скролаат“ (прелистуваат) страниците како на паметните телефони, односно ги допираат како апликациите на екран. Овде не станува збор за писменоста на децата, туку за фактот дека немаат основна способност за ракување со книги. Правилниот начин на држење книги и листање страници, како и фокусираното гледање, бараат специфични моторички и перцептивни способности кои се развиваат преку игра и физички контакт со предмети.
Воспитувачите и учителите, наместо да се занимаваат со едукација, дури 1,4 часа дневно трошат на менување пелени или помагање на децата кои одат во тоалет, и проценуваат дека губат 2,4 часа дневно поради фактот што децата немаат основни животни вештини
Повеќе од половина од воспитувачите и учителите за таквата неподготвеност на децата за во градинка и училиште ги обвинуваат паметните телефони, односно прекумерното користење на телефоните не само од страна на децата, туку и од нивните родители, кои, наместо да го посветат своето време на воспитување на децата, го поминуваат тоа време „скролајќи“ по екраните, а за децата да бидат мирни, и ним им даваат екрани во рацете. Наместо игра и споменатиот физички контакт со разни предмети, тој физички контакт во суштина се однесува само на држење телефон или таблет во рака.
Станува збор за голем проблем, а ситуацијата, всушност, станува сè полоша. Ова истражување покажува дека дури 37 проценти од децата кои започнуваат со предучилишно образование не се подготвени за училиште, што претставува скок во однос на 33 проценти, колку што изнесувала таа бројка една година претходно.
Во некои делови на Британија, воспитувачите и учителите, наместо да се занимаваат со едукација, дури 1,4 часа дневно трошат на менување пелени или помагање на децата кои одат во тоалет, и проценуваат дека губат 2,4 часа дневно поради фактот што децата немаат основни животни вештини, пишува Скај.
