Користењето на бел шум стана популарен метод на родителите да ги заспијат бебињата, но експертите предупредуваат дека тоа може да има негативни ефекти врз развојот на детето, особено кога станува збор за развојот на јазикот.
Користењето на бел шум, кој нема варијации, може да му каже на мозокот да не обрнува внимание на звуците, што значи дека мозокот ги пропушта клучните моменти за развој на јазичните вештини
Белиот шум, кој потсетува на звукот на телевизорот или радиостаница, денес често се користи преку уреди или апликации на телефоните. Се проценува дека околу една третина од родителите користат некаков вид на бука за да им помогнат на своите бебиња да заспијат. Сепак, новите истражувања покажуваат дека белиот шум, како и сличните звуци како розов или кафеав шум, може да го попречат развојот на јазичните вештини кај децата.
Д-р Ејприл Бенасич, експерт за развој на мозокот на Универзитетот Рутгерс, вели дека ова дури може да стане јавно-здравствен проблем. Имено, монотоната природа на белиот шум може да го попречи „акустичното мапирање“ кај бебињата, процес кој е клучен за развојот на јазикот и говорот.
Бебињата се способни многу рано да препознаат и разликуваат ситни варијации на звуците во милисекунди, што им помага во формирање на јазикот. Нивниот мозок е неверојатно чувствителен на звуци, дури и додека спијат, бидејќи во тој период мозокот е најпластичен, односно најприлагодлив за развој на нови невронски мрежи. Користењето на бел шум, кој нема варијации, може да му каже на мозокот да не обрнува внимание на звуците, што значи дека мозокот ги пропушта клучните моменти за развој на јазичните вештини.
Иако белиот шум може да биде корисен за заспивање на бебињата, треба да се користи умерено и со претпазливост за да не се попречи природниот развој на јазичните вештини. Звуци со повеќе варијации можат да бидат подобра алтернатива за долгорочно користење
Д-р Бенасич истакнува дека многу родители почнале да користат бел шум поради инфлуенсерите и бројните написи кои зборуваат за неговите придобивки, но смета дека истражувањата на оваа тема не се доволно веродостојни. Иако некои родители велат дека нивните деца немаат проблеми со развојот на јазикот по употребата на белиот шум, се поставува прашање колку детскиот мозок морал повеќе да работи за да ја надомести штетата од монотониот звук.
Затоа д-р Бенасич им препорачува на родителите да користат звуци со повеќе промени, како звукот на брановите или отчукувањата на срцето, бидејќи овие звуци помагаат за подобар развој на мозокот и јазикот кај бебињата.
