ПИШУВА:
Елена Трајкова
дипломиран логопед
♦♦♦♦♦♦♦
Училиштето за секое дете претставува ново животно искуство, носејќи ги со себе своите емоции како доживување. Да се биде прваче е период кој е вреден за паметење и го помнат неговите родители или тоа самото. Детето излегува од семејното катче и влегува во училишната зграда каде треба да седи во училишната клупа.
Местото во кое претходно живеело и растело му е познато и сигурно, но сега откако станало прваче оди кон непознати и несигурни работи. Родителите се многу битен фактор за да може детето полесно да се справи во улогата на ученик.
Но за да се справи со училишните предизвици еден од важните услови е да има добро развиен говор со кој ќе може правилно да зборува и да го разбираат останатите.
Периодот од 3-6 години е период во кој говорот интензивно се развива. Дете од 5 години има околу 2.070 зборови, а на 6 години вокабуларот брои околу 2.500 зборови. Тоа е доволен фонд на зборови кои може практично да ги употреби во комуникацијата за да се разбере и со учителката и со другарите.
За да се развиваат говорните функции и говорните облици, детето треба да биде поставено пред нови задачи кои треба само да ги извршува, преку сопствени активности
Може лесно да ги следи училишните часови и да разбере што зборува учителката. Просечниот ученик од 7 години може да изговори повеќе од 3.000 зборови. Сето тоа помага да може да направат опис на особините на физичките предмети, боите, броевите, временската разлика. Првачето на говорен план е подготвено да искаже опис за сопствените сакани активности, да искаже внимание, да употребува културни фрази, и да знае многу предмети и поими.
Кога ќе го прашаат родителите како си помина во училиште првачето може да објасни како го поминало времето во училиште и да објасни што видело, што слушнало и што научило.
Оние деца кои се на предучилишна возраст најчесто кога зборуваат ги употребуваат именките, заменките и глаголите кои прават повеќе од 50% од говорот. Подготвени се да употребуваат глаголски облици во минато и идно време. Како расте со годините од ден на ден детето се повеќе почнува да ги употребува предлозите, придавките и сврзниците.
Детскиот вокабулар станува не само квантитативно поголем, туку и когнитивно побогат.
Дете со наполнети 7 години е подготвено да владее со целосен сложен систен на граматички, вклучувајќи ги и морфолошките и синтаксичните правилности. Јазикот му станува одлично средство за комуникација.
За да се развиваат говорните функции и говорните облици, детето треба да биде поставено пред нови задачи кои треба само да ги извршува, преку сопствени активности.
Доколку родителите се сомневаат во говорниот развој на своето дете и доколку сметаат дека детето зборува неразбирливо и дека не може да го разбере тоа што другите му го зборуваат, во тој случај треба да се побара стручна помош од логопед.
