Кога станува збор за времето поминато пред екран, можеби е помалку важно да се фокусираме на тоа колку долго децата ги користат уредите и туку повеќе на тоа како ги користат.
Истражувачи во Австралија анализирале повеќе од 2.000 студии кои вклучувале повеќе од два милиони деца за да ги утврдат предностите и недостатоците на времето поминато пред екран кај децата. Тие откриле дека е поважно да се земе предвид видот на содржината што се гледа отколку колку долго се гледа.
Во заклучокот на истражувањето објавено во Nature Human Behavior, истражувачите од Австралискиот католички универзитет напишале: „Откривме дека природата на интеракцијата е важна. Дигиталните платформи може да се користат за подобрување на образовните резултати, но тие исто така можат да предизвикаат штета“.
Гледањето телевизија со родителите е подобар избор
Во сите прегледани студии, учествувале деца под 18-годишна возраст. Децата кои гледале телевизија со своите родители ја подобриле писменоста во споредба со оние кои биле само залепени за екраните.
Истражувачите сугерирале дека гледањето телевизија со родителите може да ја подобри писменоста бидејќи тие често одредуваат што гледа детето, па се зголемува веројатноста за гледање образовна програма. Тие исто така можат да им поставуваат прашања на децата за програмата, што ги поттикнува да се вклучат и да ја истражат темата.
Слична поврзаност била воочена и со видео игрите, кои биле корисни само кога ги поттикнувале децата да развијат способност за разбирање и работа со бројки. Истражувачите, исто така, откриле дека гледањето реклами на дигитални уреди, како што се телевизори и компјутери, почесто доведува до нездрави избори на храна.
Американските педијатри ги повикуваат родителите да ги забранат екраните за деца под 18 месеци
Водечкиот американски лекар, д-р Вивек Марти, предупредува дека прекумерното време пред екран може да влијае на развојот на мозокот, а е поврзано и со обезноста, лошиот сон, доцнењето во говорот и проблемите во однесувањето.
Американската академија за педијатрија (ААП) не препорачува употреба на медиуми за деца под 18 месеци. За деца од 18 месеци до две години, ААП препорачува само висококвалитетна содржина и гледање на екранот само под надзор. Децата на возраст од две до пет години треба да го ограничат времето на екранот на еден час.
