Голема американска студија над педијатриски пациенти открила дека само четири проценти биле заразени со новиот коронавирус, а поголемиот број од тие случаи биле благи или асимптоматски. Со студијата е потврдена, но не е и објаснета големата загатка за пандемијата – зошто инфекцијата која досега усмрти милиони лица во светот е ретка и речиси безопасна меѓу помалите деца.
Истражувачите за потребите на студијата, објавена во списанието JAMA Pediatrics прегледале податоци на 136.000 педијатриски пациенти во седум американски детски болници, меѓу кои сите биле тестирани на коронавирус.
Позитивни биле 5374 деца (3,9%), а меѓу нив, помалку од седум проценти развиле потешки симптоми поради кои завршиле во болница. Починале осум, повеќето со претходно сложени коморбидитети, што значи дека стапката на смртност била 0,15 проценти.
“Иако меѓу децата, општиот ризик од оваа болест е низок, гледаме значајни нееднаквости помеѓу заразените и оние кои развиваат потешка форма на болеста по образец веќе виден кај возрасните“, вели авторката на студијата, Хание Разаги од детската болница во Филаделфија.
Авторите додаваат дека ќе бидат потребни дополнителни истражувања за да се утврдат медицинските состојби кои ги изложуваат децата на поголем ризик. Студијата покажала дека децата со дијабетес, а не со астма, почесто се позитивни на КОВИД-19 при тестирањата.
Нејасно е и зошто децата во најголем дел, коронавирусот едвај ги засега. Една теорија, поттикната од некои студии укажува на тоа дека клетките на носната слузница кај децата произведува помалку протеини кои му помагаат на вирусот да влезе во телото, во споредба со слузницата на носот кај возрасните.
