Празниците се како создадени за ширење на грипот, кој полека фаќа залет, а пикот се очекува во наредниот месец, предупредуваат епидемиолозите, кои советуваат да се одбегнува подолг престој во затворени простории и контакт со болни лица.
Вкупниот број на случаи на грип/заболувања слични на грип во сезоната 2019/2020 изнесува 828, се вели во последниот извештај на Институтот за јавно здравје. Оттаму информираат дека во текот на 52-ра недела од 2019 година (23.12–29.12.2019), пријавени се 158 (I=7,6/100.000) случаи со заболувања слични на грип, што е зголемување за 9,0% во споредба со минатата недела.
Пријавената инциденца е под неделната граница на сезонската активност на вирусот на грип (I=36,4/100.000), односно сѐ уште не е достигнат прагот на влез во сезоната на грип. Најголем број случаи (n=107; 67,7%) се пријавени во најголемата возрасната група од 15-64 години, додека највисока инциденца од 9,9/100.000 жители е регистрирана кај децата на возраст од 5-14 години.
„Малиот број на случаи на заболувања слични на грип, кој е под неделната граница за сезонска активност, како и нискиот процент на позитивни резултати добиени од вирусолошкиот надзор, одат во прилог на ниска (вонсезонска) активност на вирусот на грип на територија на државата“, велат од ИЈЗ.
Д-р Славе Недељковиќ: Деца со намалена отпорност, метаболички, срцеви заболувања, бубрежни заболувања треба пред сите да се вакцинираат против грип
„Секако дека се препорачува вакцинирање на дечиња од грип, од најраната возраст – 6 месеци до 9 години. Деца од 6 месеци до 3 години се вакцинираат со 0,25 мл вакцина против грип, во антеролатерален дел на надколеницата, од 3 години па нагоре со 0,5 мл. На дечињата кои првпат се вакцинираат им се даваат две дози вакцина во растојание од 30 дена, потоа еднаш годишно.
Деца со намалена отпорност, метаболички, срцеви заболувања, бубрежни заболувања треба пред сите да се вакцинираат.
Против грип не смеат да се вакцинираат деца со позитивна анамнеза кои се алергични на протеините од пилешко месо и јајца, ако се покажала алергија на претходно давање на истата вакцина, деца со невролошка болест Гилен Бареов синдром, деца помали од шест месеци и деца со акутна болест“, објаснува д-р Славе Недељковиќ, специјалист педијатар.
Грипот е заболување кое го предизвикува вирусот на инфлуенца и ги зафаќа горните дишни патишта – нос и грло, а во потешките форми и долните дишни патишта – бронхиите. Кај поголем дел од луѓето, грипот проаѓа како релативно лесно заболување, но одредени лица се изложени на поголем ризик за сериозни компликации кои може да доведат до потреба за болничко лекување, а во некои случаи и до смрт.
Болеста се пренесува по воздушен пат (при кивање и кашлање) при контакт со заболен. Периодот на инкубација најчесто трае 1-3 дена, а болниот е заразен еден ден пред да појават симптомите и 7 дена по појавување на симптомите. Започнува со општи симптоми како што се малаксаност, болки во зглобовите и мускулите, главоболка, најчесто се јавува покачена температура и до 40 степени целзиусови, кашлање и кивање.
Вакцинацијата против сезонски грип е најефикасна заштита од ова заболување (досега во земјава се вакцинирале околу 40.000 лица). Вакцината е четиритипна т.е. содржи два типа на А инфлуенца вирус и два типа на Б инфлуенца вирус.
Институтот за јавно здравје препорачува вакцинација на целото население, особено на лица кои припаѓаат на т.н. ризични групи (согласно препораките на СЗО):
- Постарите лица (над 65 години);
- Деца на возраст од 6-59 месеци;
- Лица постари од 6 месеци со хронични болести;
- Бремени жени (Вакцинацијата против грип се препорачува во кое било време од бременоста. Бебето, чија мајка е вакцинирана против грип, ќе има имунитет во првите неколку месеци од животот);
- Здравствени работници.
Општи мерки за заштита
- Избегнување на близок контакт со лица кои се заболени или сомнително болни.
- Често миење на рацете или бришење со влажни марамчиња кои содржат алкохол.
- Избегнување на допирање на носот, устата или очите после контакт со предмети за кои постои можност да се контаминирани (задолжително миење на раце).
- Заболените лица неопходно е да се лекуваат дома со цел спречување на ширење на инфекција
- Покривање на носот и устата при кашлање и кивање.
ПРОЧИТАЈТЕ И…
Интервју со д-р Звезда Спасовска: Грипот не е индикација за прекин на доењето
Препораки за лицата со симптоми на грип
- За лицата со лесна клиничка слика кои не се во ризична група се препорачува домашно лекување со симптоматска терапија, а во случај на влошување на состојбата (доколку за 3 дена нема подобрување) веднаш консултација и преглед од лекар.
- Лицата кои се со лесна клиничка слика, но спаѓаат во ризична група (хронично болни лица, бремени жени деца под две години), веднаш се јавуваат на матичен лекар со цел навремено ординирање на антивирусна терапија.
- Лицата кои се со потешка клиничка слика веднаш се јавуваат на лекар со цел хоспитализација и ординирање соодветна терапија, се вели во препораките од Центар за јавно здравје – Скопје.
