Научниците ширум светот спроведуваат лабораториски експерименти за да ја разберат високомутираната варијанта на Ковид – BA.2.86. Две групи, едната во Кина, другата во Шведска, објавија резултати кои покажуваат дека оваа нова варијанта на вирусот е „хартиен тигар“, а не опасен ѕвер кој може да предизвика проблеми.
Сепак, Си-Ен-Ен наведува дека тој впечаток може да се смени со доаѓањето на нови резултати.
BA.2.86, варијанта позната и под називот Пирола, предизвика голем интерес бидејќи изгледа радикално различно од која било друга варијанта на коронавирус што сме ја виделе досега.
Оваа нова варијанта има повеќе од 30 промени во својот шилест протеин во споредба со неговиот најблизок „предок“, варијантата BA.2 и XBB.1.5, варијанта која од неодамна циркулира.
Иако првично имаше стравувања дека оваа варијанта може да биде голема закана, како омикронот што во одредени земји, како САД доведе до најголем број хоспитализации и инфекции за време на пандемијата, овие првични резултати не укажуваат на тоа.
Оваа нова варијанта има повеќе од 30 промени во својот шилест протеин во споредба со неговиот најблизок „предок“, варијантата BA.2 и XBB.1.5, варијанта која од неодамна циркулира
Си-Ен-Ен потсетува дека кога BA.2.86 за прв пат се појави кон крајот на јули, истражувачите се фрлија во акција за да дознаат што повеќе за новата варијанта. Оваа варијанта досега се прошири во најмалку 11 земји, а најмногу секвенци пријави Данска. Експертите будно ја следат ситуацијата таму.
Во првата серија на експерименти, користејќи ја крвта на вакцинирани глувци и вакцинирани и неодамна заразени луѓе, истражувачите во Кина открија дека BA.2.86 навистина му изгледа поразлично на нашиот имунолошки систем во споредба со претходните варијанти и може да избегне дел од нашиот имунитет.
Во друга серија експерименти, истражувачите од Универзитетот Каролинска во Шведска открија дека антителата во постарите примероци на крв не можеле ефикасно да го запрат BA.2.86, но примероците од крв земени од донори само една недела порано биле многу поефикасни.
„Генерално, се чини дека ова не е ни приближно екстремна ситуација како кога се појави омикрон“, рече истражувачот Бенџамин Мурел, додавајќи дека нашите антитела не се целосно немоќни против оваа варијанта.
Иако овие студии имаат свои ограничувања, експертите велат дека се охрабрени од овие рани резултати, пренесува Н1.
Кои се главните симптоми на Пирола?
Во моментов нема докази кои сугерираат дека пирола предизвикува какви било нови симптоми кои веќе не се вообичаени со другите варијанти на омикрон.
Според студијата ZOE, тие вклучуваат:
- Течење на носот;
- Главоболка;
- Замор;
- Кивање;
- Воспалено грло.
