♦♦♦♦♦♦♦
Петнаесет деца деновиве биле примени во болница во Њујорк со симптоми на воспалителна болест, која би можела да се поврзе со коронавирус, соопшти градската здравствена служба.
Четири од децата биле тестирани позитивно на коронавирус, а шест од нив имале антитела
Пациентите на возраст од 2 до 15 години се хоспитализирани помеѓу 17 април и 1 мај и сите имале температура, осип на кожата и болки во стомакот, со повраќање и дијареја.
Нивните симптоми биле слични на симптомите на болеста Кавасаки, воспалителна болест од која најчесто заболуваат деца до петгодишна возраст, и симптоми на синдром на токсичен шок, поврзан со создавање на отрови како реакција на бактериска инфекција.
На сите деца им била потребна помош поради отежнато дишење или отежната работа на срцето. Процесот на третман на пациентите вклучувал аспирин, а ниту едно дете не починало.
„Не знаеме за што се работи“
Шефицата на здравствената служба на градот Њујорк, Оксирис Барбот изјави дека не е утврдена поврзаност помеѓу болеста и коронавирусот.
Четири од децата биле тестирани позитивно на коронавирус, а шест од нив имале антитела.
„Не сме сигурни за што станува збор“, рече таа на прес-конференција. „Со секој изминат ден дознаваме се повеќе за тоа како делува Ковид-19“.
Здравствените власти разјаснија дека може да има многу повеќе пациенти, a се пријавени само најтешките случаи. Неколку слични случаи се забележани неодамна во Европа, главно во земји кои се најтешко погодени од коронавирусот.
Ако не се лекуваат, Кавасаки болеста и синдромот на токсичен шок може да завршат фатално во некои случаи. (Хина)
