Најздраво е да јадеме свежо подготвени оброци, но понекогаш не можеме поради брзиот начин на живот. Готвењето оброци за следниот ден, па дури и за следните неколку дена е реалност, а нивното подгревање начин на живот. Сепак, без разлика на практичноста, постојат некои намирници кои е најдобро да се јадат исклучиво свежо подготвени, бидејќи подгревањето може сериозно да го наруши здравјето. Прочитајте за кои намирници станува збор:
Морковт и спанаќот се менуваат кога се загреваат
Зеленчукот како морковот и особено спанаќот содржи нитрати, кои сами по себе не се штетни, но при повторно загревање со низа на реакции се менуваат во конечен продукт: нитрозамини кои имаат канцерогено дејство. Истото важи и за целерот, репата и цвеклото, поради што се препорачува јадењата со овие состојки да се подготвуваат само свежи во количина доволна за еден оброк.
Децата се особено чувствителни на овие негативни промени во намирниците, поради што не се препорачува повторно да се подгрева супа или вариво со, на пример, моркови. Кога подгревате супа или чорба, извадете го зеленчукот и загрејте ја само течноста.
Печурките се чувствителна намирница
Печурките се исклучително чувствителна намирница. Протеините содржани во нив лесно се уништуваат, особено под влијание на ензими и микроорганизми. Доколку печурките не се исчистат добро и по термичката обработка брзо не се стават во фрижидер, може да се расипат, поради што не се препорачува повторно загревање. Сепак, доколку при подготовката на јадењето сте користеле свежи печурки кои добро сте ги исчистиле и по подготовката ги ставиле во фрижидер не повеќе од 24 часа, можете повторно да ги загреете на температура од околу 70°C.
Оризот носи ризик од труење
Често го загреваме оризот. Сепак, според Food Standard Agency, ова треба да го избегнуваме. Проблемот не лежи толку во самото загревање, туку во чувањето на оризот пред повторното загревање. Суровиот ориз, всушност, може да содржи бактериски спори кои можат да предизвикаат труење со храна. Кога оризот се готви, одреден број спори може да преживеат, да се претворат во бактерии и, ако оризот се остави на собна температура, да се размножат до точка каде што произведуваат токсини кои предизвикуваат повраќање и дијареа. Загревањето на оризот не ги отстранува овие штетни токсини.
Доколку сте имале намера да го подготвите оризот однапред, изладете го во рок од еден час по завршувањето на подготовката и чувајте го во фрижидер најмногу еден ден пред да го подгреете.
Што друго не е пожелно да се подгрева?
Поради високата содржина на протеини, не се препорачува повторно загревање на пилешкото. Повторното загревање по 2-3 дена ќе предизвика промена во структурата на протеините, што може да резултира со дигестивни проблеми. Истото важи и за друго месо, риба и јадења со јајца. Дополнително, јадењата што содржат млеко и млечни производи најдобро е да се јадат свежо подготвени.
