Иако многу родители не се свесни за тоа, и децата можат да бидат под стрес исто како и возрасните. Знаците не се секогаш лесно препознатливи, но психолозите нагласуваат дека тие постојат и дека родителите не треба ни случајно да ги игнорираат. Во случај да се игнорираат, првичните предупредувачки знаци може да се претворат во посериозни проблеми кои не се безопасни, донесува клиниката „Мајо“.
Кога детето е под стрес или е вознемирено, неговото тело ослободува хормон кортизол, кој може да предизвика грчеви во стомакот и главоболки
Но, кои се тогаш симптомите кои укажуваат дека детето може да биде под стрес? Како што објаснуваат психолозите, тие воглавно се разликуваат од дете до дете, па затоа не е лесно да се препознаат. Сето ова го отежнува дијагностицирањето на овој проблем, но најчестите симптоми се главно следните:
- Емоционални испади или зголемена раздразливост. Стресот доведува до зголемено чувство на лутина и раздразливост. Во овој случај, детето може да има емоционални испади кои не се во согласност со неговото претходно однесување или моменталната ситуација во која се наоѓа.
- Проблеми со спиењето. Се чини дека грижите и стравовите излегуваат на површина за време на спиењето. Дете кое е под стрес во повеќето случаи може да има проблеми со несоница или да има чести кошмари.
- Повлекување во себе. Родителите често можат да забележат дека нивното дете одеднаш почнало да се повлекува во себе и повеќе не се дружи со своите врсници.
- Избегнување хобија и активности кои претходно го интересирале. Кога детето почнува да избегнува одредени хобија или активности во кои уживало, тоа може да биде еден од знаците за зголемен стрес.
- Проблеми на училиште. Значајните промени во училишниот успех на детето често може да бидат знак на стрес. Стресот му отежнува на детето да се фокусира во текот на училишниот ден или додека пишува домашна задача. Емоционалните испади и гневот на училиште може исто така да предизвикаат проблеми и со пријателите или со наставниците/професорите.
- Болки во стомакот или главоболки. Кога детето е под стрес или е вознемирено, неговото тело ослободува хормон кортизол, кој може да предизвика грчеви во стомакот и главоболки.
Иако овие симптоми не мора нужно да значат дека детето е под стрес, токму овие знаци се чести предупредувања дека нешто не е во ред со детето и дека треба да се истражи точната причина за проблемот, предупредуваат психолозите.
