Дали бебето ќе се прегрее во топлите летни ноќи? Ова прашање сигурно ве мачи кога живата на термометарот ќе се искачи над 30 степени, а и вам ви е тешко да заспиете.
Телото на новородените бебиња не е во состојба да ја регулира сопствената температура, а бебињата не се во состојба сами да ја тргнат прекривката кога им е премногу топло, ниту сами да ја соблечат вишокот облека. Од друга страна, прегревањето на нивните тела може да го зголеми ризикот од синдром на ненадејна смрт на дете.
Меѓутоа, на едноставен начин на вашето бебе можете да му создадете безбедна и удобна средина за спиење во текот на летните ноќи.
Ускладете ја температурата на собата и облеката во која спие бебето
Идеалната температура за безбедно спиење на бебето е помеѓу 18 и 20 степени. На оваа температура, доколку бебето спие во тенка вреќа за спиење, доволно е тенко боди со долги ракави.
Меѓутоа, мора да знаете дека ако и вам ви е жешко, сигурно му е жешко и на вашето бебе. Значи, доколку спиете само во долна облека, на вашето бебе ќе му биде доволно боди без ракави. Според советот на Ана Ричли, медицинска сестра и акушерка, во она во што вам ви е пријатно да спиете, додадете само уште еден слој за бебето. Доколку не ви треба никаква прекривка, на вашето бебе му е потребен само еден слој тенка облека. Во многу топли услови, вашето бебе може да остане и само во пелена.
Што значи кога бебето се поти?
Потењето е начин на кој нашето сопствено тело не лади. Но, некои бебиња се потат повеќе, а некои помалку. Ако бебето обилно се поти, проверете го задниот дел од главата со допирање. Ако е жешко на допир, избришете го со влажна крпа – на лицето, вратот, рацете и нозете – и отворете ја собната врата и прозорецот.
Во текот на денот, обидете се да го одржувате вашиот дом ладен така што ќе ги држите прозорците затворени и завесите навлечени во најтоплиот дел од денот.
Спиењето на бебето во лето не треба премногу да ве загрижува доколку се исполнети сите услови за безбедно спиење, односно ако не го покривате бебето со ќебе, ако го ставете да спие на грб и ако не му облекувате премногу облека. Имено, статистиката всушност покажала дека повеќе бебиња доживуваат топлотен удар во зима отколку во лето, бидејќи родителите од страв да не им студи, ги прегреваат просториите во кои спијат и ги облекуваат во премногу слоеви облека.
