Некои пријателства можат да направат децата да се чувствуваат вознемирени, збунети и под стрес, но тешко им е да сфатат дека таквите пријателства не се добри за нив. Експертите зборуваат за знаци кои укажуваат на нездрави пријателства и ги советуваат родителите како да реагираат во такви ситуации.
Предупредувачки знаци
Секој од нас го сака чувството на припадност кон помала или поголема група на луѓе со кои споделуваме интереси. Здравите пријателства се важни и за децата и за возрасните бидејќи ни помагаат да се чувствуваме поврзани со другите, а истражувањата покажуваат дека тие имаат позитивно влијание врз целокупното здравје.
Проблемот настанува кога детето престојува во нездрав однос и пријателство кое може да биде штетно за него. Здравите пријателства се карактеризираат со соработка и поддршка, додека во нездравите пријателства обично доминира една личност која ги носи сите одлуки. Во нездравите пријателства понекогаш е видлива и агресија од една страна за да се постигне посакуваното, а спротивното може да биде и минимален или никаков труд вложен во односот и очекување другото дете да направи се.
Нездравите пријателства понекогаш вклучуваат безобразно однесување како што се исмејување или кажување тајни, непочитување на приватноста на другата личност. Често се присутни и емоционални манипулации и љубомора.
Бидете трпеливи
Доколку забележите дека вашето дете е во нездраво пријателство, предложете му да направи мала пауза од дружењето и да види како се чувствува. Ненаметливо кажете му како луѓето кои се однесуваат лошо со нас можат да создадат тешки емоции и болка.
Сепак, бидете подготвени дека детето ќе покаже отпор и дека можеби ќе му биде тешко да размислува за разделба од некој со кој е поврзан. Бидете трпеливи, тоа е процес. Децата, а особено тинејџерите, ќе влегуваат во нездрави односи, без разлика дали поради притисок од околината или некоја друга причина и понекогаш родителите нема да можат да влијаат на тоа. Она што можете да го направите е да го едуцирате вашето дете за разликите помеѓу здрав и нездрав однос и да им укажете на одредени алармантни ситуации.
Од мали нозе разговарајте со вашите деца за важноста на добрите пријателства, како изгледаат и колку е убаво чувството да се биде во такви врски. Бидете пример за однесување во здрава врска, со партнер или со блиски пријатели. Дозволете им да набљудуваат како тоа изгледа во реалноста и нека учат од вас.
