Член на научниот совет на британската влада вчера изјави дека го гледа почетокот на третиот бран на инфекција со Ковид-19 како резултат на ширењето на индискиот сој на коронавирус.
Веројатно ќе биде потребно повеќе време за инфекцијата да се прошири повеќе, поради прилично високото ниво на вакцинација кај населението, така што некое време може да има лажно чувство на безбедност, а тоа е она што не загрижува, вели професорот Рави Гупта од Универзитетот Кембриџ
Професорот Рави Гупта, член на владиното советодавно тело, тврди дека Велика Британија е во „раниот“ трет бран на пандемијата, поттикната од индиската варијанта на коронавирусот.
Запрашан во емисијата „Today“ на четвртиот канал на Би-Би-Си дали има трет бран на инфекција во Велика Британија, професорот од Универзитетот Кембриџ одговори потврдно.
„Да, забележано е експоненцијално зголемување на бројот на нови случаи, а најмалку три четвртини отпаѓаат на новата варијанта“, рече тој.
„Се разбира дека бројот на случаи е релативно низок во моментот – сите бранови започнуваат со мал број случаи и потоа стануваат експлозивни, па клучно е дека она што го гледаме овде се знаци на ран бран“, додаде тој.
Тој исто така истакна дека „веројатно ќе биде потребно повеќе време“ за инфекцијата да се прошири повеќе, поради „прилично високото ниво на вакцинација кај населението, така што некое време може да има лажно чувство на безбедност, а тоа е она што не загрижува“.
Би-Би-Си наведува дека професорот Гупта исто така рекол дека укинувањето на ограничувањата, предвидено за јуни, треба да се одложи „за неколку недели додека не се соберат повеќе податоци“.
Конечното укинување на рестриктивните мерки со кои ќе се укине какво било ограничување на собирање на луѓе на отворено и во затворен простор, британската влада го испланираше за 21 јуни. Министерот за животна средина Џорџ Јустис, за Би-Би-Си изјави дека владата не може да ја исклучи можноста за одложување на планираното укинување на ограничувачките мерки.
