Истражувачите од Northwestern University Feinberg School of Medicine откриле многу докази за когнитивна дисфункција кај повеќе пациенти кои со месеци имале симптоми на Ковид-19, а не биле хоспитализирани.
Најчестите симптоми биле мозочна магла, главоболка и вкочанетост или трнење. Други чести симптоми вклучуваат губење на вкус или мирис, заматен вид, вртоглавица и тинитус
Во студијата објавена во журналот „Annals of Clinical and Translational Neurology“, истражувачите се обидуваат да откријат нешто повеќе за одредени долгорочни ефекти кај луѓето заразени со вирусот SARS-CoV-2.
Истражувачкиот тим собрал податоци од медицински установи во 21 држава и проучувал 100 луѓе кои имале Kовид-19, a не биле хоспитализирани.
Откриле дека околу 85% од пациентите што ги проучувале имале најмалку четири невролошки симптоми.
Најчестите симптоми биле мозочна магла, главоболка и вкочанетост или трнење. Други чести симптоми вклучуваат губење на вкус или мирис, заматен вид, вртоглавица и тинитус (зуење во ушите). Кај некои пациенти, овие симптоми се појавувале повремено, а кај други траеле со месеци. Некои пациенти пријавиле дека ваквите симптоми траеле и до девет месеци.
Освен тоа, некои пациенти пријавиле дека после Ковид-19 се чувствувале депресивно или вознемирено, пренесува „Medical xpress“. Истражувачите посочуваат дека нивната студија се заснова на мал примерок, но сугерира дека на пациентите кои страдаат од долг Ковид, односно имаат симптоми со месеци можеби им е потребна дополнителна нега за целосно да закрепнат.
