Тврдоглавоста и инаетот се нешто што го следат растењето на децата. Помалку или повеќе, во одреден период, децата знаат “без причина“ да ви се спротивстават, односно да не се послушаат и да тераат по свое. Таквото однесување знае да предизвика нервоза кај родителите, па се наоѓаат во ситуација кога не се сигурни како правилно да постапат.
Во одредени периоди во текот на развојот, детето почнува да се инаети и да им се спротивставува на возрасните. Тоа не се едноставни ситуации за родителите, но стручњаците советуваат како можете да излезете на крај со инаетливо и тврдоглаво дете.
Кога детето се инаети, може да му помогнете така што нема сами да создавате дополнителна нервоза и да го продлабочувате конфликтот. За почеток, преиспитајте ја и вашата листа на правила и забрани. Објаснете му на детето кратко и јасно што точно барате од него, без други “предавања“. Во се е важна доследноста, па и во односот со децата. Ништо повеќе не може да го збуни кога еднаш нешто му дозволувате, па потоа му го забранувате.
Гушкајте го детето почесто, а во неговите мирни “фази“, кажете му колку го сакате. Поддржете го во ситуации кога тоа се труди да биде самостојно и тоа на конкретни примери. Без никакви изговори, најдете време за заеднички потфати во кои детето го диктира темпото. Ако чувствувате дека не сте во состојба да се справите со на некои ситуации, не е срамота да побарате професионален совет на време.
