Да се видат и слушнат родители како ги решаваат несогласувањата на здрав и цивилизиран начин, претставува добар пример за иднината, додека, од друга страна, да се видат како вербално или физички се пресметуваат ќе има долготрајни последици за детето.
Ако детето е помало, ќе претпоставите дека нема да се сеќава, ниту да разбере што се случува ако сте се расправале пред него. Но, дури и бебињата и малите деца можат да почувствуваат конфликт, предизвикувајќи ги да станат несигурни, исплашени и со погрешен поглед за тоа како возрасните треба да се справат со несогласувањата.
Различни студии покажале дека децата изложени на конфликти во домот, имаат поголема веројатност да имаат проблеми со нивното ментално здравје во одреден момент од животот. Едно истражување покажало дека децата од градинка чии родители често се расправале се изложени на поголем ризик од депресија, анксиозност и проблеми во однесувањето.
Забележано е дека расправиите на родителите имаат влијание и врз менталното здравје на доенчињата. Едно истражување покажало дека бебињата на возраст од само 6 месеци можат да реагираат на семејната расправија со муртење или лут израз на лицето. Исто така, веројатно е дека хормонот на стрес ќе делува на зголемување на бројот на отчукувања на срцето.
Семејните расправии влијаат на самодовербата. Истражувањата покажуваат дека децата кои се изложени на многу несогласувања во домот имаат поголема веројатност да развијат негативен поглед на животот и погледот кон себе, што покажува блиска поврзаност помеѓу расправиите на родителите и ниската самодоверба.
Ако се изложени на конфликти дома уште од мали нозе, многу е веројатно дека децата ќе имаат слаби когнитивни способности на долг рок. Ова може да резултира со слаби оценки и го зголемува ризикот од напуштање на училиштето пред да матурираат.
На пример, едно истражување покажало дека децата кои живеат во дом со многу расправии имаат потешкотии да ги регулираат своите емоции и внимание и имаат послаба способност брзо да ги решаваат проблемите.
Редовното гледање и слушање како возрасните се расправаат може да има влијание врз способноста на детето да формира здрави односи, сега и во иднина. Комуникациските вештини ги учиме од нашето опкружување и воспитување, па затоа е веројатно дека децата во домовите со многу конфликти ќе го повторат таквото однесување во сопствените односи.
Една студија покажала дека семејниот конфликт може да го промени начинот на кој мозокот на детето ги обработува емоциите и реакциите, создавајќи му повеќе социјални проблеми. Тие се со поголема веројатност да бидат агресивни, лабилни или да имаат потешкотии да ги изразат своите чувства.
Освен тоа, истражувањето покажало дека лошите врски може да се пренесат од една генерација на друга.
Родителските расправии влијаат не само на менталното, туку и на физичкото здравје. Конфликтите во домот го зголемуваат стресот, а стресот има влијание врз целокупното здравје, без разлика на возраста.
Различни студии ги поврзуваат расправиите на родителите со поголем ризик од здравствени проблеми подоцна во животот, па дури и со ризикот од нарушувања во исхраната. Тие исто така може да страдаат од главоболки, проблеми со спиењето и проблеми во однесувањето.
