Воведувањето на дохрана е голем предизвик и за мајката и за детето, бидејќи претставува една нова димензија која треба заеднички да ја откријат. Токму затоа, ова е постепен процес кој трае неколку недели или месеци, а почнува од 17 до 26 недела од животот на бебето. Точното време се одредува според индивидуалните потреби на детето и мајката. Мајчиното или вештачкото млеко е доволно до шестиот месец, но потоа веќе не може да ги задоволи енергетските и нутритивните потреби на повозрасното бебе.
Житарките најчесто се прва храна која се воведува во исхраната, потоа пире од зеленчук и овошје, па потоа следува месото.
Едноставно правило
Воведувањето на дополнителна храна по шестиот месец е важно и за да се обезбеди нормално џвакање и говор. Притоа важи едноставното правило, а тоа е: секогаш треба да се започне со намирници кои лесно се варат и кои се достапни според годишното време. Секако, важно е да се води сметка и за раното вклучување на храната богата со железо, што секако вклучува месо. Потребите за железо, се дуплираат уште во бременоста, оти фетусот уште во најраниот развој складира железо, за да создаде залихи за првите месеци од животот.
Намирници богати со железо се црвеното месо, рибата и месото од живина, што ги прави добри извори, додека во храната од билно потекло железо има во мешунките, семките од тиква, во блитвата, спанаќот, бобинките, сувите сливи, смокви и слични намирници. Сепак, апсорбирањето железо од храната од животинско потекло е подобро бидејќи железото во храната се наоѓа во хем облик, за разлика од храната од билно потекло каде се наоѓа во не-хем облик.
Зошто е важно да се воведе дохрана на време?
Месото е многу важен извор на белковини и е од висока биолошка вредност, кои на детето му се потребни за изградба на ткивата и органите. Тоа ги содржи сите есенцијални аминокиселини кои организмот сам не може да ги синтетизира, па мора да се внесуваат преку храната. Таквите белковини се нарекуваат целосни (комплетни) или високо вредни белковини. Од одредени причини некои родители предоцна воведуваат дохрана, односно црвено месо и риба, а во детството, заради интензивен раст и развој, потребите за белковини се зголемуваат и се споредуваат со оние како кај возрасните лица.
Во календарот за дохрана препорака е храната богата со железо да се воведе во седмиот месец, додека во осмиот/деветтиот месец треба да се воведе јунешко и свинско месо. Исхраната има важна улога во растот и развојот, како и при превенција и лекување на болести, па затоа е многу важно дохраната да се дава според календарот за дохрана и стручните препораки.
