Во текот на растот и развојот на новороденчињата, бебињата и децата го менуваат својот ритам на спиење и будност.
Во првите недели од животот, новороденчето спие во интервали од 10 до 19 часа дневно. Постепено, фазата на спиење се намалува, па кон крајот на првата година бебето обично спие 13-14 часа дневно. Во почетните месеци спиењето е тесно поврзано со исхраната – бебето спие кога е нахрането и се буди кога е гладно.
Со текот на времето, спиењето станува помалку зависно од ситоста и повеќе се регулира од условите и навиките на околината.
Родителите и средината каде детето живее постепено наметнуваат свој ритам на спиење и будност, кој може да биде, но и не мора да биде во согласност со биолошкиот ритам на детето.
Стручњаците истакнуваат дека спиењето и будноста се тесно поврзани со развојот на личноста. Ако околината, особено мајката, ги задоволи на соодветен начин физиолошките и психички потреби на детето, и ако детето го добие потребното растоварување преку сетилата, дразбите и движењата во текот на денот, развојот на личноста ќе биде складен, а ритамот на спиење правилен.
