Проблем со намален апетит кај децата пријавуваат дури 25 проценти од родителите. Најчесто, тие се обраќаат кај педијатар кога детето кое претходно јадело без проблем, одеднаш почнува да јаде помалку.
Ова често се случува по шестиот месец од животот, кога интересот за храна природно се намалува. Во такви случаи, ако детето е во добра општа состојба и правилно напредува во тежина, нема причина за загриженост, смируваат педијатрите.
Сепак, ако детето одбива да јаде, не внесува храна меѓу оброци и почнува да губи телесна тежина, тогаш станува збор за посериозен проблем и потребна е консултација со лекар.
Причините за слаб апетит можат да бидат различни – од анемија поради недостаток на железо, почеток на акутна болест, до хронични дигестивни проблеми. Чести се и ситуации кои не се поврзани со болест, туку со навики и однесување.
Како да го поттикнете апетитот кај детето?
Доколку не станува збор за здравствен проблем, педијатрите ги препорачуваат следниве насоки:
- Почитувајте го апетитот на детето – или неговиот недостаток
- Не го присилувајте да јаде ако не е гладно
- Не користете награди за изеден оброк
- Послужете ја храната на интересен и привлечен начин
- Вклучете го детето во изборот и подготовката на храната
- Нудете помали порции
- Дозволете му само да побара уште
- Воведете рутина – оброци во исто време
- Постепено воведувајте нови намирници
- Бидете пример со сопствените навики
- Поттикнете редовна физичка активност и престој на отворено
Намалениот апетит кај децата најчесто е привремена фаза, но вниманието и трпението на родителите играат клучна улога во создавање здрави навики.
