Вербалната злоупотреба на децата може да биде подеднакво штетна за нивното ментално здравје во возрасна доба како и физичкото насилство, покажа истражување спроведено во Велика Британија.
Резултатите од студијата спроведена на повеќе од 20 000 возрасни лица во Англија и во Велс покажаа дека луѓето кои биле изложени на вербална злоупотреба во детството, како возрасни почесто се чувствуваат изолирано од другите, имаат песимистички поглед на животот и се наоѓаат во лоша емоционална состојба.
Возрасните кои биле физички злоупотребувани како деца имаат 52 % поголема веројатност дека ќе искусат лошо психичко здравје, а таа веројатност изнесува околу 64 % кај оние кои биле изложени исклучиво на вербално малтретирање.
Иако вербалната злоупотреба во оваа студија покажала малку поголемо влијание, истражувачите нагласуваат дека разликата не е статистички значајна и дека се потребни дополнителни истражувања, можеби со поголем примерок, за да се потврди валидноста на разликата.
- Изложеноста на двете форми на злоупотреба (физичка и вербална) дополнително го зголемува ризикот на 115 %, откри студијата на Универзитетот „Ливерпул Џон Мурс“
„Нашето истражување покажува дека вербалната злоупотреба во детството може да предизвика длабоки и трајни ментални лузни, еднакви на оние од физичкото насилство. Постигнат е значаен напредок во борбата против физичкото насилство, но вербалното често се занемарува“, изјави водечкиот автор на студијата, Марк Белис, директор за истражување и иновации на Универзитетот.
Студијата, објавена во BMJ Open, исто така укажува дека вербалното малтретирање се зголемило во последните децении, „што ги поткопува долгорочните ментални придобивки кои требаше да ги забележиме поради намалувањето на физичкото насилство“.
Физичкото злоупотребување е преполовено – од околу 20 % кај родените помеѓу 1950 и 1979 година на 10 % кај родените по 2000 година, покажуваат две студии.
Но, кога станува збор за вербалното насилство, неговата застапеност пораснала – од 12 % кај родените пред 1950 година на 20 % кај родените по 2000 година.
Како што пренесува Хина, истражувачите проценуваат дека едно од шест деца трпи физичко насилство, главно од страна на членови на семејството и старатели, а едно од три е изложено на вербална злоупотреба.
Вербалната злоупотреба во детството може да предизвика длабоки и трајни ментални лузни, еднакви на оние од физичкото насилство. Постигнат е значаен напредок во борбата против физичкото насилство, но вербалното често се занемарува
ПРОФ. ЕЈМОН МЕККРОРИ, НЕВРОНАУЧНИК:
Острите зборови можат да повредат, а кога се насочени кон деца, можат да остават доживотни последици
Острите зборови можат да повредат, а кога се насочени кон деца, можат да остават доживотни последици, вели Ејмон Меккрори, професор по развојна невронаука и психопатологија на Универзитетскиот колеџ Лондон (UCL) за Conversation.
„Како невронаучник, поминав децении користејќи техники за снимање на мозокот за да разберам како раната неповолна средина и траумата, вклучително и вербалната злоупотреба можат да го обликуваат развојот на едно дете. Денес знаеме дека емоционалната злоупотреба, вклучувајќи постојано непријателски или понижувачки говор од возрасни, може значително да го промени начинот на кој мозокот на детето го согледува и реагира на светот.“
Истражувачите проценуваат дека едно од шест деца трпи физичко насилство, главно од страна на членови на семејството и старатели, а едно од три е изложено на вербална злоупотреба
Проф. Меккрори објаснува дека се засегнати неколку клучни мозочни системи. „На пример, нашиот систем за откривање закана нормално ни помага да останеме безбедни преку препознавање на опасноста и предизвикување брз одговор – добро познатата реакција „бори се или бегај“. Но, кај деца кои често се изложени на злоупотреба, вклучително и вербална, овој систем станува хиперактивен. Дури и неутрални социјални сигнали – израз на лицето, шега или добронамерен коментар – можат да се протолкуваат како заканувачки.“
Вербалната злоупотреба исто така влијае на тоа како децата создаваат односи. Во нормалниот развој, топлата вербална и невербална комуникација со родителите и негувателите – пофалбите, комплиментите, внимателното слушање и разбирање им помагаат на децата да научат како да воспоставуваат сигурни и здрави врски. Тие, исто така, им помагаат да ја изградат самопочитта и социјалната самодоверба.
„Но, вербалната злоупотреба, заедно со другите форми на малтретирање во детството, може да го ослаби системот за наградување во мозокот. Мозокот станува помалку чувствителен на позитивните искуства. Веруваме дека овие мозочни адаптации можат да го променат начинот на кој малтретираното дете го гради својот социјален свет. Можеби му помагаат да преживее во неповолна социјална средина, но со текот на времето тие носат долгорочни последици. Станува потешко да им се верува на другите; потешко да се градат врски; потешко да се поверува дека вредат и дека навистина можат да бидат сакани“, објаснува проф. Ејмон Меккрори.
