Заболувањата на органите за дишење кај децата се најчеста причина поради која родителите бараат педијатриски совет. Но, голем број од овие заболувања најчесто се обични настинки или кашлица, состојби при кои родителите сами можат да му помогнат на детето, со правилна нега во домашни услови, без употреба на антибиотици. Но, секој родител, треба да знае да ја препознае болеста кај детето и правилно да го негува додека е болно.
Кашлица – родителите треба да обрнат внимание на видот на кашлицата. Таа може да биде сува и раздразнувачка, која го вознемирува детето или влажна, која често е следена со искашлување плунка. Кај сувата, раздразнувачка кашлица, мајката може да даде топли напивки. Ако се јави длабоко кашлање во вид на кучешко лаење, ненадејно од полно здравје, родителите треба да го однесат детето на лекар. Причината за тоа може да биде или воспаление на грлото или вдишување туѓо тело (грав, грашок, кикирика, мали делови од играчки и друго).
Забрзано дишење – може да се јави при висока температура, а и при сериозно заболување на патиштата за дишење како резултат на намалениот проток на воздух во белите дробови. Брзината на дишењето може да се мери преку бројот на подигнувањата на градниот кош на детето во текот на една минута. Детето со забрзано дишење може да има воспаление на белите дробови и затоа треба веднаш да се однесе на лекар.
Затнат нос или течење од носот – може да го отежне цицањето кај младите доенчиња. Потребно е нежно да се исчисти носето. Капките за нос не се препорачуваат, освен т.н. капки од физиолошки раствор (солен раствор).
Болки во грлото или во увото – ако детето има температура, болка во грлото или увото или не може да пие течности, потребен е лекарски преглед. Не се препорачуваат никакви капки во увото ако не се препишани од лекар.
Отежнато дишење – се јавува кај тешко воспаление на белите дробови. Тоа се манифестира со вовлекување на долниот дел на градниот кош. Вовлекувањето на градниот кош се јавува поради отежнато вдишување на воздухот.
Висока температура – таа е многу чест знак што ги следи заболувањата на органите за дишење. Детето може да биде топло на допир, но сепак е потребно да се измери температурата со топломер. Во зависност од висината на температурата и од возраста на детето зависи и нејзиниот третман. Ако температурата е зголемена, треба да се лек за намалување на температурата, на секои 6 часа, во препорачаната доза, се додека температурата не се намали. Се препорачува детето да се поттикнува повеќе да внесува течности и да биде лесно облечено.
