Секогаш прво посоветувајте се со педијатар пред воведување на каква било храна во исхраната на вашето бебе, а житарките се први на таа листа. Најверојатно, ќе се одлучите за кашичка која е на база на ориз, овес, просо или некоја друга намирница, а овие се предностите на секоја од нив.
Ориз
Меѓу видовите житарки, оние на база на ориз се меѓу првите кои педијатрите им ги препорачуваат на мајките (обично помеѓу 4-6 месеци). Збогатен со железо (во повеќето случаи), овој вид на житарки е лесно сварлив, што го намалува ризикот од стомачни тегоби.
Друга предност на житариците на база на ориз е тоа што тие не содржат глутен. Иако се добар извор на протеини, овие житарки содржат помалку калциум, витамин Б3 и фолна киселина, витамини и минерали кои им се потребни на децата во овој период.
Овес
Житариците на база на овес се одличен извор на влакна кои му се потребни на детето. Вклучени во исхраната на бебето, тие му го обезбедуваат потребниот калциум и протеини, како и доволно количество железо и цинк.
Пред воведување на овој вид на житарки во исхраната на бебето, се препорачува да се консултирате со педијатар, по правило тоа е индицирано околу 6-ти месец. Покрај големата количина на влакна, овесот е добар извор на антиоксиданти, кои помагаат да се намали ризикот од срцеви проблеми и многу повеќе од тоа.
Просо
Житариците на база на просо се добар извор на витамин Б за децата. Содржат многу протеини, но и калиум, фосфор, магнезиум и железо. Исто така, просото не содржи глутен, што е голема придобивка за децата со дигестивна чувствителност.
За разлика од другите видови житарки, оние со просо се препорачува да се внесуваат во исхраната на бебињата помеѓу 6-8 месеци. Пред оваа промена, важно е мајките да побараат совет од педијатар.
Киноа
По потекло од Јужна Америка, малите и ароматични зрна киноа се меѓу житариците кои носат придобивки за здравјето на децата. Иако се смета за полужито, киноата е ценета поради својата хранлива вредност.
Додека протеините се добри за развојот на мускулите на детето, влакната, минералите (калиум, магнезиум, фосфор, железо и цинк) и витамините (витамин Б3 и Б9) придонесуваат за хармоничен развој. Се препорачува да се вклучат во исхраната на возраст од 8 месеци.
