Иако респираторниот синцицијален вирус (РСВ) може да предизвика тешки, па дури и смртоносни компликации, особено кај високоризичните групи (бебиња, постари возрасни лица и поединци кои имаат хронични медицински состојби или се имунокомпромитирани), вирусот обично не е сериозна закана за повеќето други луѓе. Ако вие или вашето дете не сте под висок ризик од РСВ, обично можете да ја пребродите благата инфекција дома со лекови без рецепт и домашни лекови насочени кон справување со симптомите.
„Типот на препорачаната нега може да зависи од индивидуалните симптоми“, вели д-р Дејвид Банах (David Banach), вонреден професор по медицина и раководител за превенција на инфекции во „UConn Health“ во Фармингтон, Конетикат. На пример, постојат лекови без рецепт кои можат да помогнат при назална конгестија (затнат нос), да го ублажат кашлањето и да ја намалат болката или температурата, објаснува тој.
Како да се лекува РСВ дома
Во повеќето случаи, постојат три главни нешта кои можат да му помогнат на лице со РСВ да се чувствува подобро, вели д-р Шерон Начман (Sharon Nachman), началничка на Одделот за детски инфективни болести и професорка по педијатрија на Медицинскиот факултет „Renaissance“ во Стоуни Брук, Њујорк. Тоа се:
- Многу течности (особено е важно да се спречи дехидрација).
- Одмор.
- Ацетаминофен (парацетамол) за намалување на температурата и болката.
Што е со антибиотиците? „Антибиотиците не се препишуваат за РСВ бидејќи тоа е вирусна болест, а не бактериска инфекција“, вели д-р Начман.
Во принцип, препораките за домашно лекување на РСВ се исти за возрасни и постари деца, вели д-р Начман. Едно важно предупредување е дека на деца под 19 години никогаш не треба да им се дава аспирин, поради ризикот од опасна по живот метаболичка состојба наречена Рејев синдром.
Антибиотиците не се препишуваат за РСВ бидејќи се работи за вирусна болест, а не бактериска инфекција
Иако детскиот ацетаминофен или ибупрофен се безбедни (следете ги упатствата на етикетата), американската Управа за храна и лекови (ФДА) не препорачува лекови без рецепт за лекување на симптоми на кашлица и настинка кај деца под двегодишна возраст, поради потенцијално сериозни несакани ефекти. Ако не сте сигурни кои лекови без рецепт се безбедни за децата, проверете кај нивниот доктор.
Природни лекови за РСВ
Постојат голем број немедицински домашни лекови кои можат да му помогнат на лицето со благ РСВ да се чувствува подобро, вели д-р Начман. Тие вклучуваат:
- Мед: Д-р Начман обично препорачува мед за смирување на болки во грлото или за помош при кашлица. „Возрасните можат да го стават во чај, а децата, под услов да се постари од 1 година, можат да земат по една лажица во нивниот сок. Сепак, не давајте мед на доенче или бебе помало од 12 месеци“, вели таа. Бактерија наречена Clostridium botulinum може да биде присутна во медот и да предизвика бебешки ботулизам кај бебиња под 1 година.
- Навлажнувачи на воздух: Ги препорачувам овие уреди бидејќи овозможуваат значително навлажнување на воздухот. Кај деца и возрасни кои дишат забрзано и на тој начин губат вода преку респирацијата, навлажнувањето ќе придонесе секретите да бидат повеќе хидрирани,“ истакнува д-р Начман.
Секој со РСВ кој има тешкотии со дишењето, висока температура или развива синкав тон на кожата (особено на усните и ноктите) треба да побара итна медицинска помош
- Бањи или туширање: Пареата во воздухот произведена од бањите и тушевите може да помогне во чистењето на конгестијата.
- Солени капки или спрејови за нос: Можат да помогнат назалните патишта да останат влажни и да помогнат при затнатост.
- Чистење на носот со пумпа (аспиратор): Користени со или без солени капки за нос, овие помагала можат да помогнат во ублажување на затнатоста и се добри за бебиња.
- Длабоко дишење: „За возрасни или деца кои се доволно големи, тие можат длабоко да вдишуваат и да издишуваат. Тоа ги тера да кашлаат и да се ослободат од густите, лепливи секрети во нивните бели дробови“, вели д-р Начман.
Кога бебе или возрасен со РСВ треба да оди во болница
Секој со РСВ кој има тешкотии со дишењето, висока температура или развива синкав тон на кожата (особено на усните и ноктите) треба да побара итна медицинска помош.
„Внимавајте како дише вашето бебе“, вели д-р Начман. „Ако имаат тешкотии, можеби ќе треба да се тестираат и да добијат кислород.“ Ова важи и за постарите деца и за возрасните: ако вложуваат голем напор за да дишат, можеби им е потребен дополнителен кислород.
Се проценува дека повеќе од 100.000, а можеби и повеќе од 200.000 луѓе (најмногу бебиња и постари возрасни лица) се хоспитализирани во Соединетите Американски Држави секоја година поради РСВ, според Центрите за контрола и превенција на болести (ЦДЦ), честопати поради тешки инфекции како пневмонија (инфекција на белите дробови) или бронхиолитис (воспаление на малите дишни патишта во белите дробови). Дури 10.000 возрасни лица на возраст од 65 и повеќе години и 300 деца помлади од 5 години умираат од РСВ секоја година, проценува ЦДЦ.
Возрасните и бебињата хоспитализирани со РСВ може да примат:
- Интравенозни течности.
- Навлажнет кислород.
- Механичка вентилација (од машина за дишење).
За имунокомпромитирани пациенти, лекарите би можеле да се одлучат за употреба на антивирусен лек рибавирин или интравенозен имуноглобулин, пишува Everyday Health.
