Во лето, особено е важно на децата да им давате доволно течности, но на летниот одмор проверете дали водата од чешма во областа каде што престојувате е здравствено исправна.
„За бебиња до 6 месеци, секако треба да ја зовриете и изладите водата пред да му ја дадете на бебето. Може да користите и специјална вода за бебиња или флаширана вода од продавница, секако без меурчиња. И за постарите деца подобро е да земаат вода купена од продавница, наместо непроверена вода од чешма“, вели Џована Армано, доктор на науки, специјалист за педијатрија. Таасоветува да се избегнуваат овошните сокови, тие се слатки и ги прават децата уште пожедни, затоа нека биде обична вода или помалку засладени чаеви.
ДОЕЊЕ
Доењето на море не само што е здраво, туку и многу практично. Не треба да се грижите за подготовката на храната, а бебето добива доволно течности. Ако имате доенче, дефинитивно се препорачува доење и во никој случај не планирајте да престанете за време на вашиот одмор.
„Не само што е поздраво, туку сте и надвор од вашето вообичаено место на живеење и можеби немате можност адекватно да подготвите храна или бебето нема да може веднаш да се навикне на каша“, советува Армано и додава:
„Кога доите, вие сте најсигурни дека бебето ќе добие се што му треба, па ако навистина не започне со дохрана на шест, туку на седум месеци, тоа не е никаков проблем“.
ЛЕСНА ХРАНА
Исхраната во текот на летото треба да биде полесна, не само за децата туку и за мајките кои дојат. Многу е топло и на сите ни треба повеќе свежо овошје и зеленчук, многу напивки, лесни супи и слично.
Поради повисоките температури храната побрзо се расипува, па храната треба да се подготвува свежа, а не да се купува брза храна од улични продавници, особено за деца.
