Познато е дека изложеноста на високи температури може да ги убие коронавирусите, а со зголемување на температурата и влажноста на површините, се забрзува инактивацијата на вирусот SARS-CoV-2, што предизвикува Ковид-19.
Меѓутоа, точната температура и време потребно за уништување на вирусот може да варираат во зависност од различни фактори. Ова може да зависи од површината на која се наоѓа вирусот и количината на присутен вирус.
Која температура го убива Ковид-19?
За да проценат која температура може да го убие SARS-CoV-2, една група на истражувачи го проучувала влијанието на температурата врз другите коронавируси. Еден од овие вируси бил SARS-CoV, кој предизвикува САРС и е тесно поврзан со SARS-CoV-2.
Истражувачите процениле дека повеќето коронавируси ќе бидат скоро во целост уништени по изложеност на температури од 65° C или повисоко, подолго од три минути. Откриле и дека е потребно подолго изложување на температури под 65° C за да се елиминира вирусот. На пример, ако вирусот е изложен на температури помеѓу 50 и 55° C, потребни се околу 20 минути за да се уништи вирусот.
Кога ја перете облеката, изберете температура од најмалку 70° C на машината за перење
И некои други студии дошле до слични заклучоци. Студија објавена во часописот „The Lancet Microbe“ испитувала како температурата влијае на големи количини на SARS-CoV-2 во лабораториски услови и открила дека температура од 70° C го убива вирусот по пет минути.
Истражувањето објавено во „Applied Physics Letters“, со користење на математичко моделирање, проценува дека на 70° C вирусот ќе биде убиен по две и пол минути. Накратко, се чини дека температурата од околу 70° C ефикасно и брзо го убива SARS-CoV-2, што ја предизвикува болеста Ковид-19. Сепак, треба да се има предвид дека ова зависи и од површината на која се наоѓа вирусот и количината на присутен вирус.
Секојдневна примена
Штом знаеме која температура може да го елиминира коронавирусот, можеме да го примениме ова во секојдневниот живот за да се заштитиме во време на пандемија. Кога ја перете облеката, изберете температура од најмалку 70° C на машината за перење. Комбинацијата на висока температура и детергенти може да помогне во отстранување на вирусот. „Healthline“ препорачува да користите ракавици кога ставате облека во машината, ако постои можност да е контаминирана.
Американскиот центар за контрола и превенција на болести (CDC) наведува дека нема докази дека амбалажата или храната се поврзани со ширење на Ковид-19, така што ризикот од инфекција со коронавирус на овој начин е многу мал. Затоа, ако нарачувате храна од ресторан или во друга ситуација ракувате со амбалажа која би можела да биде во контакт со вирусот, измијте ги рацете темелно со вода и сапун по ракувањето.
За да го отстраните SARS-CoV-2 во вашиот дом, фокусирајте се на редовно дезинфицирање на површините што често ги допирате и на миење на рацете откако сте биле на јавно место. Кога користите средства за чистење и средства за дезинфекција при чистењето, внимателно прочитајте ги и следете ги упатствата на етикетата. Некои од површините што често се допираат и кои треба редовно да се чистат се рачки на вратите, мијалник, прекинувачи, мобилни телефони, далечински управувач, тастатура и глувче.
