Колики или грчеви/болки во стомакот кај новороденчето е појава за која се уште не се знаат вистинските причини. Постојат различни теории, на пример, дека бебето голта повеќе воздух, дека јаде брзо, дека е тоа нормална реакција на кравјо млеко или дека бебето живее во стресни и несигурни услови. Родителите најчесто се чувствуваат беспомошно, бидејќи не знаат како да го утешат бебето и често се прашуваат што не е во ред.
Нормална појава
Грчевите се појавуваат од прилика по неколку недели од раѓањето на бебето и траат околу три до четири месеци. Околу 20% од бебињата страдаат од оваа состојба. Бебињата плачат и по неколку часа без прекин. Често се појавуваат во исто време секој ден. Родителите може да забележат на лицето на бебето израз на болка и грчење на нозете. Бебето заради грчевите бара почесто да јаде. Се уште не се знае зошто бебето болката ја доживува и препознава како глад.
Причини за грчеви во стомакот
Постојат многу причини, иако никој со сигурност не може да каже дали се тие вистиснките причини. Сепак, ова се оние што најчесто се спомнуваат, а тоа се:
- Психолошки причини – оваа теорија често се оспорува, иако таа тврди дека причините за колики кај бебињата се поврзани со стравот и грижата на родителите
- Проблеми со цревата – многу студии покажале дека бебето со колики има зголемено ниво на хормонот мотолин во крвта, но не се знае причината за ова, и како треба да се лекува
- Премалку пробиотици или т.н. добри бактерии во цревата – некои истражувања покажуваат дека недостаток на овие бактерии предизвикуваат грчеви кај бебињата. Препорака е да им се дава повеќе пробиотици
- Нетолеранција и алергија на млеко – се покажало дека голем број бебиња со колики се алергични или едноставно цревата не им го поднесуваат кравјото млеко. Ова се однесува и на мајките кои дојат, а кои во својата исхрана користат кравјо млеко.
Како да ги ублажите симптомите
- Потрудете се бебето да подригне по јадењето
- Обидете се да обезбедите мирна околина, како за себе, така и за детето
- Капете го бебето во топла вода, бидејќи тоа ги ублажува болките (32-37 степени е идеална)
- Масирајте му го стомачето, бидејќи на тој начин бебето се ослободува од гасовите од стомакот
- Мајките кои дојат треба да го исфрлат кравјото млеко од својата исхрана, како и кромид, кељ, грав, брокула и шумско овошје.
- Може да се обидете и со некои капки против грчеви или други додатоци кои ќе ви ги препорача доктор
