Сигурно веќе знаете дека внесувањето на доволна количина на вода е важно за општото здравје на секој – жена, маж, дете. А кога во вас расте нов живот, тогаш оваа потреба за внесување доволно вода станува уште поважна.
Она што треба да го знаете е дека потребата за течност се зголемува за време на бременоста, а еве колку точно вода треба да пиете кога сте во оваа состојба.
Колку вода треба да пијат трудниците?
Совет на експертите е трудниците да консумираат меѓу 230 и 500 милилитри вода дневно повеќе од вообичаено, вели професорот од Катедрата за гинекологија и акушерство на Медицинскиот универзитетски центар Вандербилт, проф. д-р Сузан Луис.
Тоа значи дека треба да пиете меѓу осум и 12 чаши вода дневно, додава експертот за репродуктивно здравје за жени, д-р Шери Рос.
Секако, ова е само рамковно и не е страшно ако испиете малку помалку или малку повеќе вода, бидејќи потребите за течност на сите се индивидуални, потсетува д-р Викторија Муи.
Д-р Рос вели дека потребите за течности не се менуваат нужно за време на бременоста.
„Во текот на целата бременост, многу е важно да останете хидрирани“, вели таа, додавајќи дека понекогаш е предизвик во првиот триместар ако идната мајка има мачнини.
„Доволното внесување вода е особено важно во третиот триместар, за да се спречи предвремено породување и да се подготви телото за загуба на крв при породувањето“, додава таа.
