Што е конјунктивитис?
Конјунктивитис е воспаление на слузницата, конјунктивата на окото. Окото е црвено и отечено и присутен е исцедок од окото. Понекогаш очните капаци исто така може да бидат отечени. Детето може да има чувство на пецкање или чешање во окото.
Што го предизвикува?
Причините за конјунктивитис можат да бидат различни. Најчести се вирусите, бактериите и разните алергени од околината. Затоа, конјунктивитисот кај малите деца може да биде вирусен, бактериски или алергиски.
Кај новороденчињата и малите доенчиња, причината може да биде и во стеснетиот канал од кој истекуваат солзите, а се наоѓа во внатрешниот агол на окото. Кога каналот е стеснет или запушен, солзите не се истекуваат, туку остануваат во окото и на нив може да се населат различни бактерии и да предизвикаат воспаление. Во тој случај не е важно само да се ставаат антибиотски капки, туку и секојдневно да се масира каналчето, а во случај на повторување можно е и хируршко проширување на солзниот канал.
Како се пренесува, со оглед дека е многу заразен?
Ако вирусен или бактериски, конјунктивитисот е многу заразен. Во јаслите и во другите групи во градинка, тој често се јавува како епидемија. Малите деца се во близок контакт, што го фаворизира брзото ширење на инфекцијата.
Ако се работи за алергиски конјунктивитис, детето обично има други алергиски тегоби, како што се ринитис, бронхитис или алергиски промени на кожата. Самиот алергиски конјунктивитис не е заразен, но поради изразеното чешање на окото, децата често ги тријат очите со раце кои никогаш не се целосно чисти и предизвикуваат суперинфекција, било со вирус или бактерија.
Како се лекува?
Терапијата се спроведува според типот на конјунктивитисот.
Антибиотските капки за очи треба да се даваат само во случај на бактериски конјунктивитис, но често во вообичаената пракса не се прават брисови, па затоа во повеќето случаи на конјунктивитис (многу црвено око кое пече и чеша со присутен оток на очните капаци и секреција) се препишуваат антибиотски капки.
Доколку бактерискиот конјунктивитис се повторува, добро би било да се направи брис на конјунктивата на окото за да се одреди целната терапија.
Која е најдобрата превенција?
Очињата не смеат да се тријат, особено не со валкани раце. Во градинките конјунктивитисот се шири многу брзо, па затоа капките од билки можат да бидат превенција.
Алергискиот конјунктивитис треба навреме да се воочи, односно да се испита на што е алергично детето. Тоа се обично инхалациони алергени и полен од различни растенија кои се наоѓаат во природата, во одреден период. Важно е да се следи календарот на полен, за родителите да можат соодветно да се ориентираат. На пример кога очите се црвени и чешаат за време на сезоната на цветање бреза, детето очигледно е алергично на полен од бреза. Во овој случај, родителот сам го „тестирал“ детето и во принцип не треба да го носи на понатамошни алерголошки тестирања. Само треба да избегнувате прошетки во подрачја каде што брезата расте во периодот на цветање и ќе се спречи конјунктивитис, односно алергиско воспаление на очите.
Во случај на конјунктивитис предизвикан од алергија на одредени алергени, може да се примени и лек против алергија (антихистамин) во форма на сируп или капки. Секако и понатаму е важно да се избегнува природата, односно околината каде што растат растенија на кои детето е алергично во сезоната на цветање. Постојат и специјални капки за алергиски конјунктивитис.
